29 Feb 2020 04:02

inkhel

Indona a intan chauh: Deontay Wilder

Deontay Wilder chuan Tyson Fury a hneh loh hnuah WBC heavyweight world title chu lak let a tum thu sawiin, indona chu a intan chauh niin a sawi.

Tyson Fury nen an inhnek hmasak zawk tumin an inhnehtawk a, Deontay Wilder chuan hneh loh a la nei lo tluang zel a. Kar hmasaah Las Vegas khawpuiah an inhnek leh a, he inhnekah hian Fury (30-0-1) chu a chak chiang hle a, Wilder (42-1-1) chu a che ve meuh lo a tih theih a ni.

British boxer chuan American boxer chu vawi hnih a hnek tlu hman a, a ding nghet hman mang lo tiin sawi theih a nih bakah a beng leh hmui a thi bawk a. Wilder-a trainer Mark Breland chuan round 7-naah towel a vawm lut a, MGM Grand-ah Fury chu TKO in a chak a ni.

Wilder chuan a chak loh hnuah hian a chak loh chhan chhuanlam a zawng chawp nasa hle a, a hmasa berah chuan an inhnek dawna a inthuamna rit lutuk chu a puh a. A dang pawh eng eng emaw puh tur chu a nei nual bawk a ni.

Video message a siamah Wilder chuan, “Min tantute leh min ngaisangtu zawng zawngte hnenah ka la awm reng a ni tih ka puang a. Indona hi kan tan dawn chauh a, ka rawn tho leh dawn a ni,” a ti.

“Lalpa ka ni a, ka chak tha a, chuti maia tlawm chi ka ni lo a. Pasaltha ka ni a, lalpa, duhtawk chin nei ngai lo ka ni a. A tul a nih chuan thih thleng pawhin ka insual mai ang,” a ti bawk.

A sawi zelnaah, “Thih thlenga insual hi hre thiamlo an awm a nih chuan indona hmuna thil awm dan an hre ngai lo tihna a ni ang. Kan tlukna atangin kan tho leh ang a, title pawh kan la leh dawn a, ka kir leh ngei dawn a ni,” a ti.

“Sang takin kan hawi ang a, indona a intan chauh avangin kan inhmu leh vat dawn a. Kan tlukna atangin kan tho ang a, title la thei turin ke kan pen chhuak dawn a ni,” tiin Wilder chuan a sawi a ni.