Indian Wells-a BNP Paribas Open khelh mekah Serena Williams leh Venus Williams te chuan an khingpui an hneh zel a, third round-ah an unauin an inhmachhawn dawn.

Serena hian Inrinni khan a khelhpui, Netherlands mi, No. 29 seed Kiki Bertens chu 7-6 (5), 7-5 in a hneh a. Venus pawhin Romania nula Sorana Cirstea chu 6-3, 6-4 in a lo hneh bawk a ni.

An pahnih hian Thawhtanniah an inkhel dawn a, anni pahnih inkar bikah hian vawi 28 an intawn tawhah Serena hi vawi 17 a chak tawh a, Venus hi vawi 11 a chak ve bawk a. An inhmachhawn hnuhnung 9 ah vawi 8 chu Serena hi a chak zawk a. An inkhelh hnuhnung ber chu nikum Australian Open final kha a ni.

1998 Australian Open-ah khan an unau hian second round-ah an intum a, straight-in Venus hi a chak nghe nghe a. Khami hnu kha chuan a tawp lamah hlir an intum tawh a, tun tum hi an insut hma ber pawl a ni leh a ni.

Serena chuan, “Duhthusamah chuan midang nen la intum zel phawt ila ka ti khawp mai a, mahse duh thlang thei kan ni si lo a. Eng pawh ni se, theihtawp ka chhuah ang a, eng ang chiah nge ka nih tih a hriat mai ang,” a ti.