Indian Wells khelh mekah, Roger Federer chuan British no.1 Kyle Edmund hnehin quarter final a lut.

Darkar khat chhung vel lekin Federer chuan Edmund hi 6-1, 6-4 in a hneh a, Indian Wells-ah a vawi ruk nana champion a tum mek.

Tun world no.4 ni mek Federer hian Indian Wells khelh mekah set khat mah a la hloh lova, a cha tha hle a, final a thleng lovang tih a sawi theih loh.

Tun thla tir khan vawi 20 lai Grand Slam title la thei Federer hi Dubai-ah champion in a ATP title 100-na a la.

Quarter final-ah Swiss player ropui hian world no.67 Hubert Hurkacz a hmachhawn dawn a, Hurkacz hian 24^th seed Denis Shapovalov chu 7-6 (7-3), 2-6, 6-3 in a hneh a ni.

Federer bakah hian second seed Rafael Nadal pawhin quarter final hi a lut ve bawka, Filip Krajinovic chu 6-3, 6-4 in a hneh.

Nadal hian quarter final-ah Karen Khachanov a hmachhawn dawn a, Khachanov hian John Isner chu 6-4, 7-6 (7-1) in a hneh a ni.