Indian Wells Masters khelh mekah Daria Kasatkina a che tha chho hle a, hming langsar leh rin kai thenkhat a vaw thla ta a. Semi final-ah Venus Williams pawh hnehin final a lut ta der mai.

Russian nula Daria hian BNP Paribas Open-a vawi 7 lo champion tawh Venus chu 4-6 6-4 7-5 in a hneh a, final a lut a. Kum 20 a upa Kasatkina hian set khatna hi world No. 1 pawh lo ni tawh, kum 37 mi Venus Williams lakah a hloh phawt a, mahse a hnuah a rawn lehthal leh ta a ni.

Thla hmasa khan Dubai final-ah Kasatkina hi a chak lo tawh a, tun tournament-ah hian a che fuh chho hle mai a. A kal kawngah hian vawi hnih ngawt grand slam champion lo ni tawh Angelique Kerber te, US Open champion Sloane Stephens te, Australian Open champion Caroline Wozniacki bakah seeded 8 Venus Williams te chu a hneh a ni.

Darkar thum vel bawr an inkhelh hnuah Daria Kasatkina hi a chak a, an inkhelh zawha an kawmnaah, “Ka hah khawp mai a. Dubai-ah khan tun anga lawmna hun hi ka bawhpelh a, mahse tunah chuan lawm tak takin ka lawm ta,” a ti a.

“Vawi khat inkhelh chiah ka hmabak ta a, chumi tur chuan ka inpeih e. Ka lawm tak zet a ni,” a ti bawk.

Final-ah hian Kastkina chuan world No. 1 Simona Halep emaw Naomi Osaka emaw a hmachhawn ang.