Hmeichhe tennis player tha pahnih, Naomi Osaka leh Simona Halep te chuan Indian Wells-ah ngam loh an tawng a, an zinkawng a tawp.

World No. 1 Naomi Osaka chu World No. 23 Belinda Bencic nen an inkhel a, Osaka hi a chak lo chiang hle a. World No. 2 Simona Halep pawh World No. 61 Marketa Vondrousova lakah a tlawm bawk a ni.

Czech tleirawl Marketa Vondrousova hi kum 19-a upa niin, Top 5 player a hneh hmasak ber tum a ni a, Romanian star Simona Halep hi 6-2, 3-6, 6-2 in a hneh a, fourth round chu a paltlang thei a ni.

Japanese star Naomi Osaka chu fourth round-ah Swiss star Belinda Bencic chuan darkar khat velah 6-3, 6-1 in a hneh a. California khawpuiah Simona Halep a chak bik loh avangin nikuma Indian Wells-a a WTA title hmasa ber latu, kum 21-a upa Osaka hi chak bik lo mahse World No. 1 a la ni thei zel dawn a ni.

Naomi Osaka chuan, “Ka khel tha lo hle a, phat rual a ni lo. Tun anga khel chhia leh khati taka hnehsawha ka tlawm vang khan rilru hnual ngawih ngawih tur ka nih laiin, theihtawp ka chhuah avang khan ka rilru a hrehawm vak loh phah a. Ka hmaa ding khan a khel tha em mai a, ka tan tih theih a vang em a ni,” a ti.

Belinda Bencic hian thla hmasa khan Dubai title a la a, hemi ti thei tur hian Top 10 player pali ngawt mai a hneh thei a. Quarter final-ah chuan 7-6 (7-0), 4-6, 6-2 a Anett Kontaveit hnehtu World No. 5 Karolina Pliskova a hmachhawn dawn a ni.

Bencic chuan, “Tunah tak hi chuan ka inringtawk khawp mai a, ka ball vuak a dik hle a, ka hmabak hi a fuh chho viau turah ka ngai,” tiin a sawi.

Marketa Vondrousova chuan Simona Halep a hneh hma hian 2017 French Open champion Jelena Ostapenko leh nikuma Indian Wells finalist Daria Kasatkina te chu a hneh a, “Ka tlan hnem khawp mai a, thawk khat lai phei kha chuan ka thi dawn emaw ka ti hman hial a. Ka chak thei kha ka lawm khawp mai a, khel tha ka inti ve viau a ni,” a ti.

Vondrousova hian quarter final-ah chuan 7-6 (10-8), 5-7, 6-4 a Australian Ashleigh Barty hnehtu, Ukraine star Elina Svitolina a hmachhawn ang.