Juan Martin del Potro chuan Roger Federer hnehin Indian Wells title a la a, Del Potro hi 2018 chhunga Federer hneh thei hmasa ber a ni.

US Open champion pawh lo ni tawh Del Potro hian top rank Federer hi 6-4, 6-7 (8/10), 7-6 (7/2) in a hneh a, ATP title pahnih chu a zawnin a la ta a. Kum 29 a upa Argentina player hi a zawnin vawi 11 a chak ta a ni.

An inkhelh zawhah Del Potro chuan, “Ka tha a la khur reng mai a, awih harsa ka la ti zawk a. Mumang ang mai a ni,” tiin a sawi.

A sawi zelnaah, “He tournament-ah hian ka champion ang tih ka ring pha lo a, final ropui zetah Federer ngei mai ka hneh lehnghal a. Vawiin kha chuan tennis game ropui em em mai kan khel a. Theih anga tam title lak hi ka duhthusam a ni,” a ti bawk.

Swiss superstar Federer hi kumin chhungin tumahin an la hneh thei lo a, match 17 chhung chu a chak zawn tawh a, Del Potro hian a chelh ding thei ta hlauh a ni.

“Ka fiah lo ruain ka hre mai a, theihtawp chhuaha han insanmar leh deuh ka tum pawhin awmzia a nei thei ta lo a ni,” tiin Federer chuan a sawi.

Juan Martin del Potro leh Roger Federer te hi vawi 25 an inhmachhawn tawh a, tun tum hi Del Potro chak vawi 7-na chauh a la ni a. 2009 US Open final-ah pawh an lo intum tawh a, Del Potro hi a chak zawkah a tang a ni.

ATP chanchina World No. 1 ni thei upa ber, kum 36-a upa Roger Federer hian Indian Wells Masters final lut tur hian a kalkawngah set khat chiah a hloh a. Semi final-ah Croatian mi Borna Coric lakah set hi a hloh a. Federer hi Indian Wells title kawl mektu niin, he title hi vawi 5 a lo la tawh a ni.

World No. 8 Del Potro hi a banrek tihnat vangin 2016 atang khan a chawl deuh reng a, ranking-ah pawh 1,045 ah a tla hman a. Tunah chuan Top 10 huang chhungah a rawn awm leh thei tawh a ni.