India rama Formula 1 Grand Prix neihna hmun Buddh International Circuit chu tunlaia hri leng mek coronavirus kai hlau, kalna tur nei chuang lote inkharkhipna hmun atan an hmang.

Greater Noida-a awm, km 5.14 a thui circuit-ah hian 2011 atanga 2013 thleng khan Formula 1 Indian Grand Prix an nei ve hman a. Helai hmuna intlansiak hi an titawp daih tawh a, tunah phei chuan coronavirus hri leng mek kara khung hran ngaite dahna hmun atan an hmang mek a ni.

India ramah tun hnaiah COVID-19 vei an pung chak hle a, mi 1300 chuang zetin an vei tih finfiah ni tawhin, heng zinga 32 te chuan nunna an chan tawh a. March 25 ah khan India ram pumah ni 21 chhung inkhung tura thupek chhuah a ni.

Delhi khawpuia hmun hrang hrang atanga hnathawka awmte chu anmahni khaw lam pan thei loin an tangkhang nasa hle a, ram pumpuiah lockdown an puan zui tak avangin hetianga tangkhang tam takte chu Buddh International Circuit lamah hian an dah hlawm a ni.

Thuneitute chuan Delhi khawpui atang hian hnathawktu thahnem tak chu an khaw lam panin an chhuahtir hman tho a. Chutih rualin Uttar Pradesh leh a bul hnaia khaw awm velah te COVID-19 chu an kai darh an hlauh avangin a hranpaa khung khawm mai hi an titlu ta a ni.

Buddh International Circuit awmna Jaypee Sports City-ah hian April 14 thlenga lockdown an puan chhungin hnathawktute hi an dah rih dawn a, helai hmunah hian hmun dang pan thei loa awmtir an ni.

He circuit awmna hmun tam zawk hi chu tuma tlawh theih loha khar a ni tho dawn a, a track phei chu tlawh phal loh zinga langsar pawl a ni nghe nghe a. Thuneitute chuan hnathawktu tangkhang 5,000 vel chu helaiah hian an awm theih an rin thu an sawi.