India U-19 national team chuan Tahiti chu 2-0 in an hneh a, OFC Youth Development Tournament 2019 ah an champion.
Floyd Pinto naute chu kumin kum tawp lama khelh tur AFC U-19 Championship Qualifiers atan an inbuatsaih chho mek a, hetiang atan hian Port Villa, Vanuatu a Korman Stadium-ah OFC Youth Development Tournament 2019 hi an khel a ni.
Group B ah India U-19 team hi an awm a, a thlengtu Vanuatu leh New Caledonia te nen an awmho a. An match hmasa berah Vanuatu chu 1-0 in an hneh a, chumi hnuah New Caledonia chu 4-1 in an hneh leh a, an group-ah an sang ber a. Group A lama sang ber Tahiti nen final-ah an inhmachhawn zui ta a ni.
Final-ah hian goal a lut har hle a, second half-ah chiah goal lut a awm a, hei hi India team chuan an chakpui ta a ni.
First half-ah goal thun theihna hun tha chu India hian an nei zeuh zeuh a, Sumit Rathi chuan Tahiti goal lamah a pet a, heta ball let leh hi Vikram chuan a lo dawng a. India hmahruaipui theihna hun tha a neihah Vikram hian ball chu goal chung lamah a pet ta daih a, a hun tha a bawhpelh chiang hle.
Chawlhlawk a thlen hian India chuan Tahiti goal zawnah vawi 4 chu an pet hman a, an khingpuite erawh chuan goal zawnah vawi khat mah an pet ve lo thung.
Second half an khel chho leh a, minute 52-ah substitute Gurkirat Singh chuan goal a thun a, India U-19 chu hma a hruaipui emaw tih laiin offside vangin an pawmsak ta lo.
Ninthoi Meetei leh Gurkirat Singh te thawh rah sengin India substitute Maheson Singh chuan minute 71-ah goal a thun a, he inkhela che fuh zawk India U-19 team te chu hma a hruaipui ta nge nge a ni.
Minute 83-ah Vikram chuan goal thun theihna hun tha a nei ve a, Ninthoi Meetei chuan tha zetin ball a pe a, mahse hnai deuh atangin Vikram hian a lo thun thelh hlauh a ni.
Minute 88-ah India goal hmasa thuntu Gurkirat Singh chuan Tahiti goal lamah ball chu a vawrh phei a, hei hi Vikram Partap chuan a lo tauh lut a, India chuan 2-0 in hma an hruai a.
Hun tawp thlengin goal dang a awm belh tawh lo a, India U-19 team chu 2-0 in an chak a, OFC Youth Development Tournament 2019 champion an ni thei ta a ni.
AFC qualifiers ah chuan India hi Group F ah an awm dawn a, a thlengtu Saudi Arabia, Uzbekistan leh Afghanistan te nen an awmho dawn a ni.