Mizo rawlthar Lallianzuala Chhangte chuan Nepal lamah goal hnih khungin India National Football team tana goal khung thei naupang ber a ni ta a ni. Pathianni zan khan The Sports Hub, Trivandrum Stadium, Kerala-ah kum 18 mi Lallianzuala hian 4-1 in Nepal lakah India a chak pui a, India chuan SAFF Suzuki Cup semi final a lut ta a ni.
Inkhelh zawhah inkhel.com chuan Lallianzuala hi kan be pawp nghal a, a hun hlu tak min pek avangin lawmthu kan sawi a ni.
Inkhel : Kum 18 mi lek i ni a, Sri Lanka leh Nepal i hmachhawn dan kha kan lo en ngun em em. Senior player angin i khawsa a, khatiang khawpa mahni inrintawkna kha tu hnen atanga i neih nge ?
Lianzuala : A hmasa berah chuan mahni inrintawkna min petu chu Pathian a ni a. Ka tawngtai a, a chang hi chuan ka ringhlel thin a ni, mahse Pathianin ka tawngtaina a chhan thin avangin match ka khelh hian inrintawkna ka nei thin a ni.
Tin, ka coach lo hrawn tawh zawng zawngte hian hemi inrintawkna nei tur hian min pui nasa hle a, Sir Muankimate, Sir Thlangate, ka Academy awmnaa ka coach-te zawng zawng leh India Under 19-team a ka coach-te hian min pui nasa hle a, anni chungah ka lawm tak zet a ni.
Tichuan, India coach chungah hian ka lawm em em bawk a, 'Inrintawkna nei rawh u', min ti mahse game khel tura min rin leh si loh chuan mahni inrintawkna kan nei thei ngai lo. Chutih laiin India coach erawh chuan ka chungah rinna a nghat tih min hrilh rualin min rintawk zia tilangin game min khelh tir a, inrintawkna nasa tak ka neih phah a ni.
Inkhel : India Senior Team-ah i beisei aiin an ko hma che em ?
Lianzuala : Ko hma e. India Team-a khelhte chu kan suangtuahna a ni a, mahse tun ang teh thut hian min ko ang tih ka ring phak ngai lo. Ka lawm tak zet a ni, Pathian vang chauh a ni e.
Inkhel : India tana goal khung thei naupang ber i ni a, India ram mipui kan tam a nia, hetiang khawpa tam zinga record siam hi a ropui tak zet a ni. Record thar i siam hian engtiang chiahin nge nangmahah nghawng a neih ? I hlim em ?
Lianzuala : Chhuantea khan hawn kawngah khan record thar ka siam thu min hrilh a, chutah chuan ka hre ve chiah. A ropui ka ti a, mahse chu erawh ka ngaihtuahnaah a awm ber lo. Theih tawpa goal dang khung zel tumin ka rilru ka buatsaih zawk a ni.
Inkhel : Goal hmasa zawk kha box sir atanga i thuai goal kha a ni a, a hmain khatianga tih goal tumna kha game plan-ah i nei sa em ? Nge a remchang em a, i thuai goal ta mai zawk ?
Lianzuala : Khatianga goal khung kha kei pawhin nuam ka ti a, Academy-a ka awm lai pawhin khatiang khan ka khung nual tawh thin. Tin, India Under 19 tan friendly match-ah khatiang khan ka khung tawh bawk a. Chapo thil nilo se, vanneih chu a nih rualin khatianga goal khung kha chance a awm chuan a tir atanga ka tum ve reng a ni.
Inkhel : Goal hnuhnung kha ball chu a tha alawm, khatianga goal ropui khung kha i inbeisei em ?
Lianzuala : Rowllin Borges khan ball tha tak min pe a. Keini Mizote hi chu kan lian vak lova, chuvang chuan khatiang Diagonal run ang pawh kha lei hrulah a rawn ti dawn emaw ka ti a. Chutih laiin a kangin a rawn pet ta sia, kha kha chu a goal theih mial takin tiin ka tauh ta a, ka rin phak bakin a lo goal mawi a, ka lawm tak zet a ni.
Inkhel : Mizo mipui ten kan lo support nasa che a nia, hei inkhel.com-ah pawh kan lo tarlang nasa a, Sri Lanka i hmachhawn atang tawh khan. Kan lawm a, an lawmpui nasa bawk che a, Mizo mipuite hnenah enge sawi duh i neih ?
Lianzuala : Kan che tha emaw che tha lo emaw; ka Mizo puite hi chuan min support reng thin. An chungah hian lawmthu kan sawi seng lo a ni ber mai. Min lo tawngtai pui zel se ka duh a, Mizo tihmingtha turin theih tawp ka lo chhuah zel ang.
Lallianzuala hi Zohnuai Veng, Lunglei a khawsa a ni a, Mizoram Premier League season 3-ah khan Lunglei FC chu MPL-ah a hlangkai a, hetih lai hian MPL tak tak erawh Lunglei FC tan a khel ve hman ta lova, Liverpool FC International Academy- DSK Shivajians lam a pan ta a. India Under 19 tan a inlan tawh a, SAFF Suzuki Cup-ah a vawi khat nan India senior team-ah koh a ni a, December ni 25, 2015 khan Sri Lanka hmachhawnin India tan a debut game a khel a, a game hnihnaah Nepal a hmachhawn a, goal hnih a khung a, India tan game hnih atangin goal hnih a khung ta a ni.