December ni 27, 2015 khan Lallianzuala Chhangte chuan SAFF Suzuki Cup-ah India tan goal a khung a, kum 18 mi hian 1995-a Baichung Bhutia-a record kha a khum niin India media-te chuan an ngai a, Lianzuala chu India tana goal khung thei naupang ber niin an tarlang a nih kha.
1995 khan Baichung Bhutia chuan kum 19 mi niin Nehru Cup-ah Uzbekistan lamah goal a khung. India tana goal khung thei naupang ber a ni a, he record hi November ni 4, 2004 khan Jerry Zirsanga chuan a khum a. International friendly match-ah India-in 3-2 in Kuwait an hneh. Kha match-ah khan Jerry Zirsanga chuan kum 16 leh ni 315 niin goal a khung. India tana goal khung thei naupang ber chu Jerry Zirsanga a ni ta a ni.
India media ten India tana goal khung thei naupang ber chu Lianzuala an tih lai hian Mizo sports writer hranghlui, tun thleng pawha Mizo mipuitena kan la ngaihsan Pu Mamuana (Y2Goal) chuan Jerry Zirsanga kha India tana goal khung thei naupang ber a nih thu a rawn sawi chhuak a. Khang hunlai khan India ramah Football ngaihven a la nilo lehzual a, India media te pawhin an ngaihven loh bakah statistics mumal taka vawn a nih loh thu Pu Mamuana chuan a sawi a ni.
International match hi 'A' niin, hei hi FIFA pawhin tehfung atan bera an hman a ni a, Uzbekistan nena India match pawh hi Nehru Cup a ni a, heng tournament penhleh hi FIFA chuan official-in a pawm lova, chuvang chuan Baichung Bhutia-a'n Uzbekistan lamah a goal khung pawh kha FIFA chuan a statistics vawnnaah a telh ve lo a ni.
Pu Mamuana'n he thu a sawi chhuah hnu ni 5 velah India media te chuan Jerry Zirsanga chu India tana goal khung thei naupang ber a nih zawk thu an hre leh hnuhnawh a ni. Jerry-a hi TFA chhuak niin, 2004 khan naupang te niin India team-ah koh a ni a, midfielder Jerry-a hi India club lian Mohun Bagan, Dempo leh Churchil Brothers-ah te a khel kual a, 2013 khan Mohammedan tan khelin, I-League atanga an relegate hnuah Jerry-a hian Football khelh chawlhsan a tum hnai niin goal.com chuan a tarlang nghe nghe a ni.
India tana goal khung thei naupangte (Source : Pu Mamuana)
1. Jerry Zirsanga@16 & 315 days (Friendly : 3-2 Kuwait - Nov.4, 2004)
2. Lallianzuala Chhangte@18 (SAFF 2015 : 4-1 Nepal - Dec.26, 2015)
3. Baichung Bhutia@19 (Nehru Cup 1995 : 1-0 Uzbekistan - Mar.1995)
Social Networking site thenkhatah Lianzuala nge Jerry Zirsanga India tana goal khung thei naupang ber ni zawk ? Tih inhnialna a awm nual. Hei hi Mizote tan chuan chanchin ngaihnawm tak a ni a, Lianzuala'n Nepal lama goal a khung kha kan ngaihluin ropui kan ti, hetih lai hian Jerry Zirsanga India media ten theihnghilh mahse a ropui zia hailan a ni leh ta zawk hi kan lawmpui a.
Duhthusamah chuan Jeje-a leh Lianzualate hi India tana goal khung hnem thei zawk nih inchuh deuh rap rap se, India team-ah Mizo leh Mizote hi position khat inchuh rap rap tham awm tawh ila, Mizo nih a va nuam dawn tak em. A la rei lo, I-League-a Mizo khel Mizoram media-ten an fak vul chuk hunlai kha. Vawiiah zet chuan fak bik tur awm tawh chuang lovin Mizo Footballer tam tak ten India football kan luhchilh mek, nakin lawkah chuan India Football Power House chu Mizoram a la ni ngei dawn e.