MC Mary Kom chuan Nilaithawhtan khan World Women’s Boxing Championship semi final a thleng a, India tan gold medal lak theih ngei a tum thu a sawi.

Quarter final-ah Mary Kom chuan Ulan Ude, Russia-a 51 kg category-ah Rio Olympics bronze medallist Ingrit Valencia chu a hmachhawn a, Manipur boxer hi 5-0 ngawtin a chak a, semi final hi a lut thei a ni.

Mary Kom chuan, “Quarter final-ah ka chak a, semi final chu ka lut ta a. Ka la chak thei zel hi a lawmawm ka ti hle a, India ram tan hian medal sang thei ang ber lak ngei theih hi ka duh a. Theihtawp ka chhuah zel ang a, beiseina sang tak nen gold medal lak ngei ka tum a ni,” a ti.

“Hmabak a la ko viau a, semi final-ah chak leh theih ngei ka tum ang a, final hi luh theih phawt a pawimawh a. Final ka lut thei ta a nih chuan chak theih ngei ka tum leh dawn a, gold medal chu lak ngei ka duh a, chutiang tih theih chu ka tum tlat dawn a ni,” a ti bawk.

Semi final a thlen chhoh tak avangin Mary Kom hian medal chu a dawng tawh dawn hrim hrim a, World Championship medal pariat a lakna a ni tawh dawn a, AIBA World Boxing Championships bikah chuan khawvela boxer awm tawh zingah medal la hnem ber a ni dawn a ni.

Inrinniah hian semi final chu an khel ang a, hetah hian third seed Mary Kom chuan second seed Turkish boxer Busenaz Cakiroglu chu a hmachhawn dawn a. Busenaz Cakiroglu hi European Championships title kawltu a nih bakah European Games gold medallist a ni bawk a, Mary Kom hian hna hautak zet a thawh a ngai dawn a. Busanez hian quarter final-ah Chinese boxer Cai Zongju chu a hneh a ni.

Indian boxer Lovlina Borgohain pawhin a khingpui a hneh a, 69 kg category-ah quarter final a lut ve bawk a. Lovlina Borgohain hi Morocco boxer Oumayma Bel Ahbib nen an inhnek a, Indian boxer hi 5-0 in a chak a ni.

Jamuna Bora chuan 54 kg category-ah Algerian boxer Ouidad Sfouh chu 5-0 in a hneh a, quarter final a lut chho thei bawk a ni.