NBA Commissioner Adam Silver chuan kum tharah chuan India ramah pre-season NBA game an khelh theih tur thu a sawi a, Mumbai khawpuiah khelh a ni thut thei niin a sawi.
India rama NBA tihlarna atan May 2017 khan NBA chuan Greater Noida-a Jaypee Greens Integrated Sports Complex-ah NBA Academy an din a. Hemi hnu hian NBA chuan naupang an hrual chho thin a, New Delhi leh Bengaluru atangin mipa leh hmeichhe naupang 20 rualte chu Jr NBA World Championship-ah India aiawhin an tel zo chiah bawk a ni.
Adam Silver chuan, “Jr NBA World Championship-ah India aiawh pawh an tel a. India ramah academy kan nei tawh a, kum tharah emaw chuan Mumbai khawpuiah pre-season game kan khel maithei a ni,” a ti.
“Pre-season game hi India ramah kan khel a nih chuan player te leh an chhungte chuan inkhelh hmain India ram hi an zir chiang thei ang a. An ram chungchang te, an khawsak phung te pawh an hriat theih phah dawn a ni,” a ti bawk.
NBA Commissioner chuan India ramah Reliance Foundation thawhpuiin an huang zauh belh zel an tum thu a sawi.
“India ramah tun aia nasa lehzuala inzar pharh zel kan tum a, Reliance leh Mukesh Ambani te nen hian kan inkungkaihna a tha hle a, India ramah grassroot basketball an khel nasa a, chuvangin, keini pawhin nasa zawka hma lak zel hi kan phur phah hle a ni,” tiin Adam chuan a sawi.
Silver hian Jr World Championship chu an pawl tan nakin zelah a la tangkai tur thu a sawi a. “Tun tumah khan helai hmun rawn thlen tumin ram 70 atangin mi 10,000 vel zet an rawn tel a, tu te pawh kha an phur em em vek mai a, kar khat chhung an rawn awm a, nuam an ti a, an hlawkpui hlawm viau chuan kan hria,” a ti.
“Thiamna chi hrang hrang kan lo zirtir a, an rilru chhawk zangkhai dan te kan hrilh bawk a, hei hi kan tan chuan bul tanna duhawm tak mai a ni a. Nakinah chuan kan tan a la tangkai dawn hle tih a chiang a ni,” a ti bawk.
A vawi khatna atana ESPN Wide World of Sports Complex-a an buatsaih Junior World Championship zawh takah khan USA chu an chungnung hle a, mipa leh hmeichhiaah US Central team te chu an champion ve ve a. Central girls chuan Europe girls team chu 68-38 in an hneh a, Central boys chuan Africa & Middle East team chu 60-50 in an hneh bawk a ni.
India pawh kut ruakin an haw bik lo a, hmeichhe player Sunishka Kartik chuan Community Award a dawng a ni.