20 Dec 2018 07:03

inkhel

India ramah NBA game an khel dawn

National Basketball Association (NBA) chuan 2019 pre-season game pahnih chu India rama khelh a nih tur thu an puang.

Nilaithawhtan khan NBA chuan thuchhuah siamin 2019 season tan hmain India ramah game hnih chu khelh a nih tur thu an tarlang a. NBA team pahnih Indiana Pacers leh Sacramento Kings te chu Mumbai khawpuiah an inkhel dawn niin an sawi.

NBA India Games 2019 chu Mumbai khawpuia NSCI Dome-ah neih a ni dawn a, an khelh hun tur hi October 4 (Zirtawpni) leh October 5 (Inrinni) te an ni ang.

Inkhel chauh hi a ni dawn lo a, NBA leh an thawhpuite chuan fans te tan hun buatsaih an tum bawk a. Jr. NBA youth basketball programme bakah NBA Cares kaltlangin outreach hun an hmang dawn bawk a. Mumbai khawpuiah NBA fans te chu an fuan khawm teuh tura ngaih a ni.

Sacramento Kings chu an hotupa kaihhruaina hnuaiah India ramah an rawn kal dawn a. Kings neitupa, Chairman ni bawk Vivek Ranadivé hi India rama piang a ni a, Mumbai khawpuia cheng thin a ni. NBA khawvelah chuan team nei thei hmasa ber niin, Kings-ah hian share a nei deuh vek a ni.

Kings-ah hian 2018 No. 2 overall draft pick Marvin Bagley III, 2017 No. 5 overall draft pick De’Aaron Fox leh 2016 No. 6 overall draft pick Buddy Hield (Bahamas) te chu an awm mek a ni.

Vivek Ranadivé chuan, “Sacramento Kings chuan a vawi khatna atan India ramah NBA game kan khel thei dawn a, a lawmawm ka ti hle a. Indian-American ka nih angin ka pianna rama he infiamna ropui tak thlenpuitu zinga ka tel thei hi lawmawm ka ti leh zual a. India ramah basketball hi a thang nasa hle a, hei vang tak hian NBA huang zauh kan tum pawh hi a phurawm phah leh zual a ni,” a ti.

Indiana Pacers-ah hian 2018 NBA All-Star Victor Oladipo, 2016 NBA All-Rookie second team member Myles Turner leh 2016 No. 11 overall draft pick Domantas Sabonis (Lithuania) te an awm mek a ni.

2006 atang khan NBA leh WNBA player ni thin leh ni mek 35 te chuan NBA aiawhin India ram an rawn tlawh tawh a, NBA hian 2011 khan Mumbai khawpuiah office an hawng a ni.