India ramah FIBA 3x3 World Tour Masters

05th September 2018, 02:09AM

India chuan khawvela basketball tournament ngaihhlut berte zinga mi FIBA 3x3 World Tour Masters chu tun thla hian an thleng dawn a, India ram aiawh tur team pakhat zawkah Lalrina Renthlei pawh a tel dawn a ni.

FIBA 3x3 World Tour Masters hi a vawi khatna atan India rama nghah a ni dawn a, Hyderabad khawpuiah September 22 atanga tan tur a ni dawn a.Hyderabad Masters-ah hian khawvel hmun hrang hrang atanga 3x3 team rual an tel ang a, 3BL team chungnung pahnih - Delhi 3BL leh Bangalore 3BL te chu an tel dawn bawk a ni.

India ram aiawha tel turte hi 3x3 Pro Basketball League (3BL) behchhan khan thlan chhuah an ni a, 3BL hi a vawi khatna atan kumin June ni 9 atanga August 26 chhung khan India ram hmun hrang hrang 6 ah khelh a ni.

Bangalore team lamah hian Lalrina Renthlei, Sowkin Shetty, Amit Sehrawat leh Rajan Sharma te an tel a. Delhi team-ah hian Inderbir Gill, Bikramjit Gill, Leandro Souza de Lima leh Kiran Shastri te an tel a ni.

Hyderabad Masters hi FIBA 3x3 World Tour stage 7-na a ni dawn a, tun tum hi India rama international 3x3 basketball tournament an khelh hmasak ber a ni dawn a. Heta team telte hian October 27-28 a FIBA 3x3 World Tour Bloomage Beijing Final a tel thei nih an tum hlawm dawn a ni.

International team tha Novi Sad (World No. 1), Piran (No. 3), Belgrade (No. 9) leh team dang thahnem tak an tel dawn a. Heng team hrang hrangah hian international player chungnung pawl Simon Finzgar (World No. 8) leh Anze Srebovt (No. 9) te pawh an tel dawn a ni.

Hyderabad Masters Chairman Yoshiya Katoh chuan, “India hian an la tawn ngai loh thil an tawng a, FIBA 3x3 World Tour thlengtu an ni ve thei hlauh mai a. Khawvela khawpui dang 9 chauhin hetiang hun tha hi an nei ve thei a ni,” a ti.

“Indian basketball tan tun hi hun tha tak mai a ni a, khawvela ram hrang hranga team tha deuh deuh leh player tha em em mai te an hmachhawn thei dawn a, tawn hriat ngah belh zelna remchang a nih bakah anmahni an intuaihriam zel theihna atan a tha dawn a. Hetiang hun chhinchhiah tlak tak kan tawng thei hi a ropui tak zet a ni,” a ti bawk.

League Commander, 3BL, Rohit Bakshi chuan, “Ka lo suangtuah nasat thin em em chu ram hrang hrang inelna huanga India in medal an dawn theih hun hi a ni a, 3x3 basketball-a medal dawn theih hun hi ka nghakhlel tak zet a. Delhi 3BL leh Bangalore 3BL te hian Hyderabad Masters-ah dinhmun tha deuh luah thei turin thiamna an nei a, FIBA 3x3 World Tour Finals an thleng thei chiang a ni,” a ti.

Copyright © inkhel.com 2024. All rights reserved.