India chuan May 30 atanga June 2 thleng awh tur Basketball Without Borders tih chu a thleng dawn a. He programme hian Asia khawmualpuia basketball lama tui mi thalai rual a hip khawm dawn a ni.

NBA, FIBA leh Basketball Federation of India te thawhhona zara he camp hi New Delhi-a NBA Academy-ah neih theih a ni dawn a. Tleirawl kum 17 hnuailam chin te tana he camp hi buatsaih a ni dawn a, Asia-Pacific huam chhunga awm te tan tel theih a ni ang.

BWB Asia 2018 ah hian basketball thiam hmeichhia leh mipa kum 17 hnuailam an fuan khawm dawn a, NBA leh FIBA player te chuan heng tleirawl rualte hi an zirtir dawn a. Milar leh coach tha rualte pawhin zirtirna an pe bawk dawn a ni.

NBA leh BFI te chuan India ram chhunga mite tan bik May 27-29 chhung khian hmeichhe pualin camp an buatsaih dawn bawk a. NBA Academies Women’s Program kal zel atanga he camp hi buatsaih a ni dawn a. Hmeichhia kum 17 hnuailam 20 atanga 25 vel chu camp-a lut tur hian an thlang ang.

Heng training camp chi hnihah hian NBA Cares leh Junior NBA hmalakna hrang hrang telh a ni dawn a. FIBA leh NBA te hian Basketball Without Borders hi ram hran hran 27 a khawpui hrang hrang 33-ah vawi 53 an buatsaih tawh a. 2001 khan bul an tan a, hetiang camp an buatsaih atanga chhuak 50 chuang zette chu NBA ah an lut tawh a ni.