PUBG tia hriat lar, Player’s Unknown Battleground chu khawvel hmun hrang hrangah a lar chak hle a, India ramah pawh bu a khuar nghet chho viau tawh a. Hetiang taka India rama a hlawhtlin theihna chhan ni thei awm hi tlem chu han thlir kual thuak ila.
Computer atanga khelh theih turin PUBG chu a chhuak tan a, 2018 kum chawhnu lamah khan Tencent chuan mobile hmanga khelh theihin an siam chhuak a, PUBG Mobile tiin a hming pawh an vuah thlap a. Hemi hnuah hian beisei phak bakin he game kheltu hi an pung chho a, naupang kum 7 vel bawr atanga puitling kum 40 ral kai thlengin an khel nasa hlawm hle a ni.
Mobile leh computer game dang tam tak a awm a, hetiang taka a nawlpuiin an buaipui hi a tam vak lo tiin a sawi theih a. Heti taka a lar chhoh theihna tur kawng thenkhat te:
1. 4G network leh mobile phone man tlawm:
Tun hnuah khawvel hmun hrang hrangah 4G network chuan a hmaa network te a luahlan hneh tawh hle a, India ramah phei chuan Jio in kawng a sat kua a, hetiang lama intlansiakna tha tak hi a chhuah phah a tih theih a. Service provider dangte pawhin tan an la chho a, network chak si, hman man tlawm si an duang chhuak teuh hlawm a ni.
China ram siam mobile tha tak tak, man tlawm tak tak a tam tawh a, heng hmangte hian thalaite chuan an duhtawkin game an khelh theih phah a. Phone chak tha mamawhtu PUBG Mobile pawh China ram siam hmanga khelh te a lo nuam a, hei hi a bulpui pakhat te zinga sawi tel loh theih a ni lo.
2. A thlawna khelh theih:
PUBG Mobile chu a thlawna download theihin a siamtute chuan an chhawp chhuak a, India ram te ang, game vel atana pawisa sen hrehna hmunah chuan a tla na lo thei lo a. Tencent chuan PUBG Mobile chu a thlawna download theihin an siam a; mahse, a game chhungah hian pawisa hmanga lei theih tur thil chi hrang hrang - Royale Pass, Premium leh Premiun Plus membership te an dah tel thung a ni.
Game kheltute tan thil lei theih hi chhawp mahse, a nawlpui tan chuan lei kher lo pawhin PUBG Mobile chu a khelh theih vek tho a, hei tak hi an tihfuhna pakhat chu a ni.
3. Computer ang deuhin mobile-ah:
Game khel thinte tan PUBG Mobile khelh theiha an siam hma kha chuan computer atangin hetiang lampang hi an khel nasa hle a. He game an siam chhuah chiah khan computer atanga an khelh thin nen a inzul hle a, hei vang hian hetiang lampang game ngainatute chu a hip hneh hle a. India rama hetiang taka a lar chhohna chhan pawimawh tak pakhat pawh a ni a tih theih.
4. Thianzaho inlungrualna:
He game hi thianzahoa khelh a rem em em a, thiante nen a huhoa khelh hian a nuam lehzual bik a, hmun khata awm khawm chunga khelh te chu a boruak a lo danglam ve zel a. Mini Militia a hlawhtlin hnuah thianhoa khelh theih duan chhuah leh thaa an hriat chu an tifuh hle a, Tencent in PUBG Mobile an duan chhuah chhan fuh ber pawl niin a sawi theih a, thiante nen inlungrual takin he game hi a khelh theih avangin inkawm thinte tan chuan a hlu zual a ni.
5. Tournament awm hnem:
Tencent chuan PUBG Mobile an tlangzarh hnuah tournament an buatsaih fo a, player te’n an thiamna an pho chhuah theihna tur hun leh hmun tha an siamsak nasa a. India ramah 2018 khan OPPO nen tang kawpin Tencent chuan Campus Mobile tournament te an buatsaih a, hemi hnuah hian PUBG Mobile India Series pawh an buatsaih leh bawk a. Heng tournament-ah te hian pawisa tam tham tak man theihin an dah a, hei hian mi a hip nasa lehzual a ni.