01 Aug 2020 05:24

inkhel

India ram pawna khelh tum a pawimawh: Bhaichung Bhutia

Bhaichung Bhutia chuan India rama footballer te chu ram pawn lama khelh tum tura a duh thu a sawi.

India captain hlui Bhaichung Bhutia chuan 1999 kumah khan English club Bury FC a zawm a, Indian footballer zingah chuan European club zawm thei hmasa ber niin, Mohammed Salim hnuah chuan Europe khawmualpuia professional game khel leh thei hmasa ber a ni.

A hnu deuhah Bhaichung Bhutia hian loan-in Malaysian football club Perak FA a zawm leh a, India ram pawn lamah chuan hun eng emaw chen chu a khel ve hman a. Bhutia hnuah hian tuna India captain ni mek Sunil Chhetri hi ram pawnah a feh chhuak ve leh a, mi dang pawh rei vak lo feh chhuak an awm ve bawk a ni.

Sunil Chhetri chu America ramah a kal a, Kansas City Wizards a zawm a, chu bakah Portuguese club Sporting Clube de Portugal reserve team ah pawh a awm ve hman bawk a. Indian goalkeeper Subrata Paul chuan Denmark club FC Vestsjaelland a zawm a, Gurpreet Singh Sandhu pawhin Norway club Stabaek FC a lo zawm ve tawh bawk a ni.

Indian footballer zingah ram dang league vela khel sawi tur an awm lo hle a, hetiang kawngah hian Bhaichung Bhutia chuan rual a awt hle a. Footballer tam zawkte chuan ram pawn lama khelh theih tum ngei se a duh thu hi a sawi chhuak a ni.

English club Bury FC tana game 37 khel hman, Malaysian club Perak FA tana game 8 khel bawk Bhutia chuan tlema footballer la naupang deuh zawkte chu ram chhunga lungawi mai lo tura a duh thu a sawi a ni.

“Ram dang league vela khelh hi a tha a, hmasawnna tam tak chhar chhuah tur a awm a, football awmze dik tak kan hre chiang thei zawk a. Professional football awmzia te, football kalphung te hi kan hriat bel theih phah hle,” a ti.

“Thil thar kan zir chhuah phah teuh a, player kan nihnaah pawh kawng tam takah hma kan sawn belh bawk a. Ram danga ka khelh khan kei chuan nasa takin hma ka sawn chiang a ni,” a ti bawk.

A sawi zelnaah, “Europe khawmualpui khera khelh tum a ngai chuang lo a, footballer te chuan Qatar, UAE, China leh Japan ramah te pawh khelh tum a tha hle a. Europe khawmualpuiah pawh tlema league hniam ve deuh, Belgium tih velah te khelh theih dan kawng dap a pawimawh viau a ni,” a ti.

‘Sikkimese Sniper’ chuan tlema league hniam deuha khelh dawn chuan hlawh phut san vak theih a nih dawn loh thu sawiin, chutiang te chu kawng zau zawk ngaihtuah dawn chuan inhuam a tul thu a sawi a ni.

A vanglaiin Bhaichung Bhutia hian India ram tan game 82 a khel hman a, hengah hian goal 41 a thun a ni.