India ram kha nuam ka ti lo: Lewis Hamilton

14th November 2018, 10:11PM

Lewis Hamilton chuan Formula One kalphung chu a thlawp loh thu sawiin, intlansiak buaipui vak lo rama intlansiak tura an ti thar fo chu dik a tih loh thu a sawi a. India ramah pawh an lo tlan tawh thu kha sawiin, India ram chu nuam a tih loh thu a sawi.

Formula One chuan Vietnam Grand Prix an ti thar dawn a, 2020 khian Hanoi khawlaiah F1 intlansiak hi an ti tan dawn a, helai hmuna intlansiak tur hian kum 10 chhung atan thuthlung an ziak fel tawh a ni.

World champion Lewis Hamilton chuan F1 kalphung chu a thlawp loh thu a sawi chhuak a, ram thenkhat, intlansiak pawh ngaihven em em ngai lote chu F1 Grand Prix thleng turin thuthlung an ziahpui leh thin tih sawiin, dik theia a hriat loh thu a sawi tel.

Hamilton chuan, “India ramah pawh ka kal tawh a, kan intlansiak ve ngei tawh a. A ram kha a nuam ka ti lo a, a changkang lo si a, mahse mak tak maiin intlansiakna erawh a thain a ropui em em mai a. Hmun thing deuha khatiang kan han hmu mai kha a mak duh khawp mai a, ngaihtuahna a tibuai vek mai alawm,” a ti.

“Hmun thar tur ngaihtuah kual vak vak kher lo hian Silverstone Grand Prix leh London Grand Prix tih vel te awm tha hle hle se a fuh ber zawkin ka ring a ni,” a ti bawk.

F1 chuan a hmaa intlansiakna pangngai an lo neih thin bakah China, India, South Korea, Singapore, Abu Dhabi, Bahrain, Russia, Azerbaijan leh Turkey ah te huang an lo zauh tawh a. Heng hmun hrang hrangah intlansiak an belhchhah chungchangah hian ngaihdan inang lo tak tak a awm nual a ni.

Tun hnaiah Europe khawmualpuia intlansiakna thenkhat chu an dinhmun a derthawng chho hle a, a bikin England, Germany leh Italy te chu chhunzawm loh mai theih dinhmunah an ding mek a. France pawh kum 10 chhung zet chu an chhunzawm lo a, tun season-ah hian an ti thar leh chiah a ni.

“England, Germany leh Italy ah te hun rei tak intlansiak a lo ni tawh a, United States lamah neih a ni leh a, tunah phei chuan a thang nasa tawh hle a. Mahse, heng hmunah te hian kum khat chhungin vawi khat theuh chauh kan tlan a, sumdawnna lampang zawnga ngaihtuah chuan duhkhawp a har viau a ni,” a ti.

“Ka thu ni se, duhthusam hi thleng dik thei dawn bawk se heng ramah te hian a tam thei ang ber intlansiak hi ka neihtir ang a. Turkey ramah kan intlansiak a, entu an awm mang lo a. A track a thain a nuam a, a hmun a nuam a, boruak a nuam hle a, mahse mipui an awm tlem hle a ni,” a ti bawk.

Singapore-ah Formula One chu a hlawhtling chho phian a, India ram leh South Korea ramah erawh a daih rei lo hle a ni.

Copyright © inkhel.com 2024. All rights reserved.