Indian Super League (ISL) a khelhna hmun a chan ve hmain Puitea tia hriat lar, Lalthathanga Khawlhring chuan substitute bench lamah game nga chhung chu hun a hmang phawt a. Tunah chuan NorthEast United tana player pawimawh tak a ni chho tawh a ni.
Lalthathanga Khawlhring hian Mizoram Premier League lamah bul a tan a, Bethlehem Vengthlang-ah a khel thin a, hemi hnu hian DSK Shivajians a zawm a. DSK academy lamah a awm chho a, 2015-16 season-ah khan midfielder tha bera thlan a ni a. January 8, 2017 khan DSK tana a game hmasa ber a khel ve tan a, hemi season chhunga I-League game an khelh hmasak berah Mumbai hmachhawn turin a inlan a ni.
Cooperage Ground-ah DSK Shivajians leh Mumbai te chu an inkhel a, a tawpah Mumbai chu 1-0 in an chak a, a tir atanga a tawp thlengin Puitea hian a khel a. DSK tan hian game 4 a khel a, goal erawh a thun lem lo a ni.
July 29, 2017 khan Indian Super League club NorthEast United FC chuan Lalthathanga Khawlhring an lei thu an puang a, kum thum chhung atan contract an ziahpui a. An inlei hnu hian loan-in an chhuahtir zui nghal a, 2017-18 season chhungin Aizawl FC chuan an hawh a ni.
Aizawl FC tan hian game 18 a khel hman a, hengah hian goal khat chu a thun a. 2018-19 season tan dawnah NorthEast United lamah a kir leh a, October 1, 2018 khan FC Goa an hmachhawn tumin NorthEast United tana a game hmasa ber chu Puitea hian a khel a. Tunah chuan player hmasawn chak tak, beiseiawm ber pawla sawi a ni der tawh a ni.
Puitea chuan, “Pathian khawngaihna zarah season ka hmang tha ve hlein ka hria a, tun dinhmun ka thlen theih chhan ber hi chu coach leh management staff te vang liau liau a ni a, ni tin min thlawp that vang a ni a. A tir atang khan thil thiam belh tumin theihtawp ka chhuah ngar ngar a, chu chu ka tan a tangkai ta hle a ni,” a ti.
“A tirah chuan khelhna hmun ka chang tam thei lo a, taimak ka chhuah a, rim taka ka inbuatsaih zarah tunah chuan game pawh ka khel hnem ve thei tawh a, heng zawng zawng hi theihtawp ka chhuah vang a ni,” a ti bawk.
Dutch coach Eelco Schattorie chu Puitea hian a fak hle a, an coach zarah khelmualah pawh hmun a chan chhoh ve theih phah niin a sawi. “Kan coach chungchanga ka rilru la hmasa bertu chu dikna a duh em em mai hi a ni. Kan inhrawn hmasak ber ni atangin theihtawp ka chhuah a, dawhtheihna ka neih a pawimawh thu min hrilh nghal,” a ti.
“Coach chuan a tirah chuan min khelhtir lo fo dawn tih a sawi a, mahse khelhna hun erawh min siamsak tur thu chu a sawi tho a. Coach berin min beisei dan leh min hmuh dan a sawi tlang bawk a, hei vang hian khelhna hmun ka chan theih nan ka inbuatsaih thiam phah a, rilru lamah pawh ka inpuahchah thiam phah bawk a ni,” a ti bawk.
NorthEast United chu a vawi khatna atan playoff khel thei turin an tling a, hetiang dinhmuna an dinna kawngah hian Puitea chu game tinah a tel kim vek a, an game hnuhnung 14 ah vawi 12 chu bul a tan nghe nghe a ni.
Kum 21-a upa Puitea chuan position hrang hrangah a khelh theih avangin coach pawhin a chhawr tangkai chho viau a. A changin left wing lamah te a awm a, a chang leh central midfield lamah a awm a, a chang chuan right back te a ni leh lawp lawp bawk a ni.
“Ka khelhna tur position chungchang hi coach chuan a sawi ri ngai lo reng reng a. Ni khat chu left wing-a ka khelh theih leh theih loh min zawt a, kei chuan ka khelh theih thuin ka chhang a. Hemi hnu hi chuan position hrang hrangah min khelhtir nual tawh,” tiin Puitea chuan a sawi.
Mizo tlangval Puitea hian NorthEast United-ah kum khat chhung chu hun a la nei a, Eelco Schattorie erawhin an club a chhuahsan a, Kerala Blasters lamah a kal daih tawh thung a ni.
Manchester City manager Pep Guardiola ngaisangtu Puitea chuan position hrang hranga a khelh theih chhan ber chu TV kal tlanga European football a en nasa chu a nih a rin thu a sawi a ni.
“TV lamah football khel hi ka en nasa hle a, a bik takin midfielder hrang hrangte che vel hi ka en uluk thei khawp mai a. An tih dan te hi ka lo entawn a, chhinchhiah pawh ka nei teuh thin a, hei vang hian position hrang hrangah pawh ka khelh theih phah niin ka hria,” tiin a sawi.
A sawi zelnaah, “India rama footballer tha ber pawl nih theih hi ka tum ber a ni a, midfielder tha berte zinga mi nih theih hi ka duhthusam a ni nghe nghe a. Ka position chu left winger a ni emaw, central midfielder emaw pawh ni se, Indian midfielder tha berte zinga ka tel thei a nih chuan a tha tawk viau a ni,” a ti.
A bul tanna lampang sawiin, “DSK Shivajians head coach Dave Rogers kha ka tan chuan a tangkai khawp mai a, kawng tam takah min tanpui nasa hle a. Ka taksa thunun theih dan tur te, thil ei tur leh ei loh tur chungchang te, mut hun te, hun thawl zawk ka neih dan turte thlengin min hrilh thin a. Thil tenau lutuk awm lo khan min hrilh nasa thei em em a, tun thlengin ka chhawr tangkai hlawm hle,” a ti a.
“DSK khan gym te, swimming pool te leh engkim mai kha an nei tha hle a, ka tan phei chuan thil thar kha a ni vek mai a. Khatiang taka thil changtlung kha ka la hmu ngai lo bawk a, ka tan chuan a phurawm em em mai a ni,” a ti bawk.
Tun hnaia India national team coach thar Igor Stimac hnuaia player koh thar an awm nual chungchangah Puitea chuan a hun a la thlen ve mai a rin thu a sawi a, “Player te chuan engtikah emaw ram tana khelh theih kan tum theuh a, ram chhunga player tha ber berte chauh chu an ko thin a ni,” a ti a.
“National team-a tel theih hi thil awlsam a ni lo chiang a, mahse theihtawp ka chhuah ang a, rim taka ka thawh chhoh zel chuan engtikah emaw ka tan hun a la inhawng ve thei a. Pathian khawngaihna zarah India ram aiawha khelh hun hi ka la neih ve ngei ka ring,” a ti a ni.