25 Mar 2019 05:19

inkhel

India mipa team aiin hmeichhe team an tha zawk: Chhetri

Sunil Chhetri chuan India hmeichhe football team te chu mipa football team te aiin an tha zawk daih niin a sawi.

India football team captain Sunil Chhetri hian tun hnaiah khan India mipa team leh hmeichhe team te chu a khaikhin a, a tawpah hmeichhe team te chu mipa team aia tha zawk hi niin a sawi a ni.

Tun hnaia ranking chhuak tharah India hmeichhe team te chuan an thleng sang angreng hle a, ram 152 zingah 62-na an ni thei a. Hetih lai hian mipa team lam chu an tlahniam deuh thung a, ram 211 zingah 103-na an ni mek bawk a. Nikum lam khan India mipa team te hi Top 100 huang chhungah an awm thei a, kuminah chuan huang pawn lamah an tawlh chhuak ta a ni.

Chhetri chuan tun hnaia a zawna vawi nga ngawt SAFF title la thei, India hmeichhe team te chu a fak hle a. Hmeichhe team te hnenah hian, “In vaiin in fakawm a, ka chhuang em em vek che u. A hma daih atang tawhin hmeichhe team te hi mipa team ai chuan in tha zawk tih hi ka thinlungah a lian viau tawh reng a ni,” a ti.

Football khelh la chawlhsan lo zinga mahni ram tana goal thun hnem ber dawttu Sunil Chhetri chuan, “In chanchin hi ka ngaihven reng a, tun aia hma sawn lehzual thei turin tan la chho sauh sauh ula. Myanmar-ah pawh in kal leh ang a, a tha thei ang bera chet in tum dawn ania,” a ti bawk.

April 3 atang hian Mandalay, Myanmar-ah hmeichhe team te hian Olympic qualifying round 2 an khel dawn a, India hi Myanmar, Nepal leh Indonesia te nen an awmho a ni.

All India Football Federation (AIFF) president Praful Patel pawhin India hmeichhe team te chu a lawmpui thu a sawi a ni.

Praful Patel chuan, “Hmeichhe team te’n SAFF Championship title an lak theih avangin ka lawmpui khawp mai a, champion dik tak an nih zia an tilang chiang hle. Tuna an hming thatna ang hi a dang tam tak neih belh zel turin duhsakna ka hlan a, hlawhtling chho zel turin theihtawp chhuah chhunzawm zel turin ka chah duh bawk a ni,” a ti.