India chuan 2026 FIFA World Cup qualifier second round-ah Afghanistan an hneh lo.
Indira Gandhi Athletic Stadium, Guwahati-a inkhelah hian 2-1 in an tlawm a, goal khung hmasa zawk ni mahse an tang tluan zo lo. First half bik enin an khel tha zawk a, Liston Colaco leh Brandon Fernandes-te inkawpin Sunil Chhetri an chawm hneh viau mai.
Bengaluru FC forward hian ram tana a game 150-na a khel a, goal ban tih perin a pet lut teuh hle. Ball let leh hi Manvir Singh chuan changin a khung bik lova, hei hi minute 90 chhunga an chance neih that ber a ni.
Mikhual chan chang Afghanistan pawh an khel chhe hran lova, Haroon Amiri chuan huntha neiin India si ban vengtu Gurpreet Singh Sandhu a paltlang zo lo. Darkar chanve an khelh tlin hnuah Manvir-in ball a chang a, dinglam sir atanga thlawh lutin penalty an hlawhchhuak a, Afghanistan centre-back Amiri chuan a kutin ball alo khawih.
Penalty hi Chhetri chuan petin international football-a a goal 94-na a khung a, si khata hmahruai chungin an chawl. Second half an atanga rei vak loah India coach Igor Stimac a chechhuak a, Liston, Brandon leh Chhetri-te thlakin a tifuh vak lo.
Minute 70 an khelh tling tihah Afghanistan player Zelfy Nazary leh Mosawer Ahadi-te'n ball an tlanluhpui a, Rahmat Akbari chuan a tawp kharin an si phur a sut. Hemi hnu hian India an thochhuak leh tawh lova, bet zawkah tangin an in kat tir a ni deuh ber.
Huntawp dawn tawhah Afghanistan forward Jabar Sharza-in ball a khalh lut a, India goalkeeper Gurpreet chuan lo ti tluin penalty a chawi chiang hle. Sharif Mukhammed chuan penalty hi goal-ah chantirin, mikhual team chakna goal a khung a, an duh ber point thum an hlawhchhuak bawk.
An result hian table-a India dinhmun a ti danglam lova, Afghanistan nena an inkarah erawh point khat mah a awm ta lo. Ashley Westwood enkawl mek team hian an point hmuh zat ang tho point li an nei a, goal difference hmangin Stimac leh a naute an sang hram.
India hian Nikir thla ni rukah Kuwait an tum dawn a, third round lut turin chak ngei ngei an mamawh. An inhnehtawk anih chuan Kuwait-in beisei an la nei ve dawn a, anni hian an match hnuhnung berah Afghanistan an su dawn a, chak zawk an awm chuan Hamara Desh an tla ang.
Blue Tigers hian Kuwait an hmachhawnna game hnuhnung pathumah tlawm an nei lova, a hnuhnung ber chu nikum Sahmulphah thla khan niin 1-0 in an chak. Nikum kum tir lam khan SAFF Championship-ah vawi hnih an inhnehtawk a, India sulhnu tha hret mahse chapo thei an nilo.
Afghanistan laka an tlawm avangin Stimac a buai lova, point hmu zo lo mahse third round an lut thei tih a sawi. Croatian coach hi Indian football fan-te'n an hne takzet tawh a, stadium an chhuahsan dawnah "Bang rawh" tia au rualin an duh tawh lo. Kum 56 mi hian third round an lut lo anih chuan a bang dawn tih a sawilawk a, Nikir thla ni rukah engkim tih chianin a awm dawn a ni.