ICC Men’s World Cup 2019 ah India chuan New Zealand an hneh lo a, an zinkawng a tawp ta a. Tun tum tournament-a India hnuhma thenkhat han thlir kual ila.
Nilaini khan semi final an khel a, India chuan Old Trafford-ah New Zealand chu run 18 in an hneh ta lo a, khuain a zir loh avangin anni hi ni hnih chhung an inkhelh phah a. New Zealand chuan run 239 an siam a, India tan chak turin run 240 siam a ngai a, hei hi an khum thei ta lo a ni.
Rohit Sharma century 5:
122 not out vs South Africa
140 vs Pakistan
102 vs England
104 vs Bangladesh
103 vs Sri Lanka
Batsman zingah chuan World Cup tum khat khelha century vawi 5 siam thei hmasa ber leh awm chhun a la ni a, World Cup 2019 ah a vaiin run 648 a siam tling hman a, a batting average chu 81.00 a ni.
Virat Kohli 50 panga:
82 vs Australia
77 vs Pakistan
67 vs Afghanistan
72 vs West Indies
66 vs England
India captain Virat Kohli chu tun tournament-a run siam hnem ber dawttu niin, a pumpuiah run 443 a siam a, a average chu 55.37 a ni.
Opening-a century vawi 4:
Rohit Sharma leh Shikhar Dhawan te chuan Australia nen an inkhelhin run 127 an vaw chhuak a. Rohit leh KL Rahul te inkawp chuan Pakistan an hmachhawn tumin run 136 an siam a, anni pahnih inkawp tho hian Bangladesh lakah run 180 siamin, Sri Lanka nen an inkhelh tum pawhin run 189 an vaw chhuak leh bawk a ni.
Shikhar Dhawan century:
India leh Australia inkhelh tumin Shikhar Dhawan hi a inhliam a, Pat Cummins ball vawm chuan a kutzungpui veilam a fuh a. Heti chung hian darkar thum dawn chu Dhawan hian a khel zui a, run 117 zet siamin run 342 zet an siam theihna kawnga thawh hlawk ber a ni.
World Cup bikah chuan Australia hian an khingpuite run an siamtir hnem ber tum a la ni a, The Oval-a inkhelah hian India chu run 36-in an chak zui a ni.
Mohammed Shami hattrick:
Southampton khawpuia Rose Bowl-ah Afghanistan chuan ball 4 an la nei a, chak thei turin run 12 an siam a la ngai a, wicket 3 a la awm bawk a. Mohammed Shami a che a, Mohammad Nabi, Aftab Alam leh Mujeeb Ur Rahman te chu a zawnin a vawm chhuak a, World Cup-ah chuan Indian bowler zinga hattrick siam hmasa ber dawttu a ni a. 1987 khan Chetan Sharma chuan New Zealand lakah hattrick a lo siam tawh bawk a ni.
Point hmu hnem ber:
Round-robin stage an khelh zawhah team 10 te chuan match 45 theuh an khel hman a. Heng team 10 zingah hian India chuan point an hmu hnem ber a, an point hmuh zawng zawng hi 15 niin, vawi 9 an chak a, semi final an khelh hma kha chuan England chiah an hneh lo a ni.