India khan engzat nge an hlawh theih?

16th July 2019, 11:07PM

ICC Men’s Cricket World Cup 2019 chu an zo ta a, he tournament hi khawvela tournament lian berte zinga sawi tel thin a ni a. India chuan champion theih inring viau mahse semi final-ah an zinkawng a tawp ta a, England chu champion an ni.

Kumin World Cup-ah khan sum leng vel a thahnem thawkhat hle a, a huaihawttute pawhin tournament ropui tak mai hlawhtling taka an zo thei chu inchhuan phahna atan an hmang hial maithei a. Player lar tak tak, tlema upa deuh leh naupang deuh thlengin team tan theihtawp an chhuah tlang hlawm a, mahni ram tan chanchin duhawm tak thlentir an tum hlawm a ni.

Player te thawhrimna zarah cricket chuan infiamna khawvelah hmun a chang thuk ve tial tial a. International Cricket Council pawhin World Cup atan hian pawisa an theh chhuak hnem ve tial tial bawk a ni.

Tuna an kalphungah chuan 2019 World Cup ah khan vawi khat mah chak ve lo mahse team pakhat chuan $100,000 an dawng thei tho a. Champion team te, pahnihna leh semi finalist te chuan thleng sang ve thei ta lote ai ngawt chuan an la hnem daih dawn tih chu chiang sa a ni.

World Cup vawi 12-naa lawmman atana pawisa an dah dan:
Champion - $4,000,000 (2015 ah $3,975,000)
Runner-up - $2,000,000 (2015 ah $1,750,000)
Semi-finalists - $800,000 (2015 ah $600,000)
Winner of each group stage match - $40,000 (2015 ah $45,000)
Teams eliminated in group stage - $100,000 (2015 ah $35,000)
(2019 World Cup-ah quarter finalist hranpa an awm loh avangin ICC chuan group stage lamah pawisa hi an belh theih phah a ni.)

Group stage khelha team chak zawk te khan vawi khat chakah $40,000 zel an dawng a. Heti a nih chuan India kha match 7 ah an chak a, group stage-a an chak vangin $280,000 ($40,000 x 7) chu an dawng phawt tihna a ni a. Hei hi India ram pawisain dah ta ila, Virat Kohli leh a pawlte chuan Rs. 1,90,40,000 zet chu group stage atang ringawtin an dawng tihna a ni.

India chuan semi final an lut a, semi final-ah hian New Zealand nen an inkhel a. India chuan New Zealand an hneh ta lo a, chak lo zawk an nih avangin $800,000 chu an dawng a. Semi final an luh theih avanga an pawisa dawn hi Rs. 5,44,00,000 zet chu a tling thei ta tho a ni.

Tun tum tournament group stage-a India pawisa dawn leh semi final-a an pawisa dawn te hi belh leh ta ila, a vaiin $1,080,000 a ni a, hei hi India pawisa chuan Rs. 7,34,40,000 (Seven crores thirty four lakhs and forty thousand) a ni.

Men in Blue chuan 2011 World Cup champion an nih khan Rs. 17,22,50,000 an dawng tling a, 2015 World Cup-ah khan Rs. 5,74,20,000 (Group stage-ah vawi 6 an chak a, semi final an thleng bawk) an dawng bawk a. Heti a nih chuan 2019 a pawisa an dawn hi 2015 ai chuan a tam zawk daih a, amaherawhchu 2011 chu pha lo tak a ni thung.

Copyright © inkhel.com 2024. All rights reserved.