Oliver Kahn chuan FIFA World Cup-ah India an la tel ve thuai dawn tih a sawi.
Germany leh Bayern Munich goalkeeper hlui hian Pro10 initiative pualin Mumbai chhim lama awm GD Somani Memorial School a tlawh a, Indian leh Maharashtrian tihdan phunga lo hmuah a ni. Kahn hian thu tha tak tak sawiin sikul naupang a fuih a, Mumbai khawpui chhunga hmun pawimawh thenkhat a fang bawk.
Kum 54 mi chuan, "Football hi infiamna chi khat a ni ringawt lova, mi tam tak tan nunna a ni. Ka zinkawnga harsatan ka tawhte khan chakna min pe a, 'Beidawng suh' tih hi ka rilruin ka vawng reng thin. Mi taima leh thawkrimte chiahin hlawhtlinna an chang thei a, mi thatchhia leh zawm thaw tan khawvelah hmun a awm lo.
"India hian football-ah theihnasa sang tak in nei a, ka mit ngeiin in ngainat zia ka hmu bawk. Thochhuak thei in nih laiin in la muthlu a, khawvel hmuha inphochhuak turin theihna lian tak in nei. Nakin lawkah football-a ram ropui in la ni thei a, World Cup-ah pawh in tel thuai ka ring." tiin a sawi.
Kahn hian kum 15 liamta khan India a tlawh tawh a, Bayern tana a khelh lai niin Salt Lake Stadium-ah Mohun Bagan an hneh a, hei hi professional football-a a game hnuhnung ber a ni. 2008 Tomir thla ni 27 zana inkhelah hian a hmunah mi 130,000 vel zetin an en a, Bagan team-ah Lalawmpuia (Tuaitea) pawh a tel.
Bayern hian Zan Schaldrauff goal hnih leh Ze Roberto goal khat khung an chakpui a, Kahn hian minute 55 chhung khelin lawm a hlawh hle. Kum 15 liamtaa thil thleng hi Ottmar Hitzfeld tan pawh a chhinchhiahtlak khawp mai a, Bayern a enkawlna game hnuhnung ber a ni.
Kahn hian a inkhelh chhungin hlawhtlinna a chang hnem khawp mai a, a vanglai hun zawng zawng chu Bayern-ah hmangin a chenchilh rei hle. A chawlh hnuah Chief Executive niin kum thum chhung a awm leh a, kumin Tomir thla khan engemaw avangin an ban.
An hnawhchhuah chhan hi chiang taka sawilan awm lo mahse, Julian Nagelsmann leh Sadio Mane-te chungchangah inrem lohna an nei niin an sawi a, a kawppui thin Hassan Salihamidzic pawh a rualin an ban. Bayern atan a khelh chhungin Bundesliga-ah vawi riat lai an champion a, German Cup vawi ruk lain, Champions League leh UEFA Cup vawi khat ve ve an chawi a ni.