14 Mar 2018 10:53

inkhel

India hockey team-ah Mizo nula Lalremsiami

India chuan April 4 atanga tan tur Gold Coast 2018 Commonwealth Games a tel turin hmeichhe hockey team a khel turte a ruat fel tawh a, mi 18 zingah Mizo nula Lalremsiami a tel.

April 5 khian Wales nen an inkhel dawn a, Pool A ah India hi awmin Malaysia, Wales, England leh South Africa te nen an awmho a. Striker chhuanvawr Rani Rampal chu India team captain a ni ang a, goalkeeper Savita chu vice-captain a ni ang.

Lalremsiami hi SYS leh SAI tang kawpin an din, Thenzawl-a Women Hockey Training Centre-ah kum 6 (2011-16) chhung hockey zirin a awm a, Mizoram aiawhin vawi duai lo a feh chhuak tawh a. India tan pawh Bangkok, Thailand ah 2016 khan Asia Cup U-18 ah telin, 2017 khan Kakamigakara, Japan ah Asia Cup ah a tel leh a, hetah hian bronze medal an la nghe nghe a ni.

2016 khan National Hockey Academy a zawm a, November 22, 2017 atangin National Junior Camp a zawm leh bawk a. Tunah chuan India senior team ah a tel chho tawh a, dinhmun pawimawh a luah chho mek a ni.

India hmeichhe team hi khawvelah No. 10 ni lai mek an ni a, an aia rank sang zawk - England (No. 2), New Zealand (No. 4) leh a thlengtu Australia (No. 5) te pawh an tel a. South Korea lamah 5-match series ah an chak zo chiah bawk a, chief coach Harendra Singh chuan an aia sanga awmte pawh an lehthal theih vek thu a sawi.

Harendra Singh chuan, “Tuna kan team member te hian an khelho nasa tawh hle a, hei vang hian an inhre chiang ve thawkhat tawh a ni tih 2017 Asia Cup kan champion theih danah pawh a lang a. South Korea ah pawh keini aia rank sang zawk kan hneh thei a, hei vang hian Commonwealth Games-ah pawh kan chet chhiat ka ring lo. Kan inrintawkna hi a tha khawp mai,” a ti.

India hmeichhe hockey team te hian 2002 khan England rama Commonwealth Games nghah a nih tumin gold medal an lo la tawh a, hemi tum hian a thlengtu England chu 3-2 in an hneh a. 2006 khan Australia rama Commonwealth Games ngha a nihin a thlengtu hneh loin silver medal an lo la tawh bawk a. 2010 leh 2014 te khan pangana an ni pha chauh a, kumin hian beiseina an nei sang hle.

Squad:
Goalkeepers
1. Savita (VC)
1. Rajani Etimarpu

Defenders
3. Deepika
4. Sunita Lakra
5. Deep Grace Ekka
6. Gurjit Kaur
7. Sushila Chanu Pukhrambam

Midfielders
8. Monika
9. Namita Toppo
10. Nikki Pradhan
11. Neha Goyal
12. Lilima Minz

Forwards
13. Rani (C)
14. Vandana Katariya
15. Lalremsiami
16. Navjot Kaur
17. Navneet Kaur
18. Poonam Rani