15 May 2019 01:45

bakteaJr.

Mizo tlangval

India football team head coach thar Igor Stimac

AIFF chuan India football team head coach thar atan Croatian footballer hlui Igor Stimac an ruai fela, kum hnih daih contract an ziahpui.

AIFF president Praful Patel chuan Stimac an rawih chungchang sawiin, “Blue Tigers enkawl tur hian Igor hi kan mi duh tak a ni a, Indian Football hian thil inthlak danglam hun lai a tawng chho meka, Igor-a tawnhriat tam tak hian hmun sang zawk min thlenpui ngei ang tih hi ka chiang a ni,” a ti.

Stimac hi player a nih lai pawhin a theuneu lo hle a, kum 1998 World Cup-a Croatia in semi-final an thlen tum khan Stimac hi an defender rinrawl a ni a, English football lamah pawh lo khel tawh thinin Derby County leh West Ham tan kum 1995 leh 2001 inkar khan a lo khel tawh.

Kum 2002 khan Stimac hian inkhelh chawlhsanin kum 2005 atang khan club enkawl a nei tan a, kum 2012 leh 2013 khan Croatia National team lo enkawl tawhin world ranking-ah Croatia hi palina lai a lo nihpui tawh bawk.

AIFF in Stimac hi an rawih dan chungchangah Stimac hi Indian player 36 awmna room-ah hruai luh niin, India head coach a niha a player koh turte thlan chhuah tir a ni a, a player thlan chhuah danah hian Indian football a zir chian zia lang niin AIFF chuan an ngai a, an ruai ta niin The Indian Epress chuan a tarlang.