All India Football Federation (AIFF) chuan India rama football kalphung thar tur an duang fel ta a, thil eng emaw zat ti danglamin an siam tha.

India ramah football league sang pahnih an awm a, Indian Super League (ISL) leh league hlun zawk I-League te an ni. Asian Football Confederation(AFC) hotute leh AIFF hotute chu an inhmukhawma, ISL leh I-League-te club te tana AFC Champions League luh dan kawng an duan sak bawk.

Kum 2022-23 season atangin I-League champion chu ISL-ah an lut thei tawh dawn a, I-League champion hian ISL lut tur hian participation fee eng mah a chawi a ngai dawn lova, a chet that vang liau liauin a thlawnin a lut dawn.

ISL hi kum 2024-25 season atang chuan closed-league anga kalpui a ni ve tawh dawn a, sum ngah apiang tan a zawm theih ngawt tawh dawn loh bakah promotion leh relegation pawh a awm ve tawh dawna, team tling zat tur leh tla zat tur hi rel chawp leh tur a ni thung.

ISL hi official-in India rama league sang ber a ni chho dawna, I-League chu official-in India rama second division a ni chho dawn bawk. Tunah erawh season thum chhung chu India football hi tuna a kal dan sa hian a kal zel rih ang.

ISL-a champion te chuan AFC Champions League khelh theihna hun tha an nei tawh dawn a, Champions League play-off ah hmun pek an ni dawn. I-League champion-te chuan AFC CUP play-off ah hmun an nei thung dawn a ni.