Cricket chanchinah chuan khawvela ODI batsmen tha ber berte zingah Virat Kohli hi sawi tel loh theih a ni lo a. Tunlai batsmen zingah chuan a tha ber pawl a ni a, Kohli hian record chi hrang hrang a siam chho tawh a, a siam belh zel bawk a. Tun hnaiah pawh ODI run 11,000 siam tling hma ber record a siam a ni.
Captain a nihna lam atanga thlirin chanchin dang pawh a nei nual a, ODI bikah chuan a kaihhruaina hnuaiah India chu 70% vel an chak thei a, hei hi tun hmaa captain ropui nia an sawi thinte record siam nen a inang tlang vel a ni.
A hmaa mite record ang vel chu Kohli hian nei thei mahse a khelhpuite zar zoin a hmaa mite ai mahin a lan that hmel lehzual ni te pawhin a hriat theih a. A team-ah Rohit Sharma, MS Dhoni leh Jasprit Bumrah te a neih chhoh avangin a tan chuan chanchin duhawm tak tak a awm nasa lehzual niin a ngaih theih bawk a. Captain reng reng tan chuan hetianga player tha em em mai neih thuau theih chu duhthusam a ni ber mai.
Virat Kohli hian game hrethiam em em mai MS Dhoni a hmang tangkai thei a, field chhungah thutlukna a siam zung zung theih phah a. IPL vela che tha thei tak Rohit Sharma a nei bawk a, thui tak chu a zarah hlawhtlinna hmel an hmuh theih phah thin.
Kohli leh Dhoni te inkara inhriatthiamna te, inpawhna te, inrintawnna te a awm that em avangin India team pawhin an tangkaipui phah hle a. Tun hnua ODI an khelhah pawh India chu an chak hnem phah hle a, Dhoni chuan run a vaw chhuak tha em em a, Kohli chuan tactic a ruahman fuh thei hle bawk a ni.
Che tha viau thin mahse tihsual chang pawh Kohli hian a nei ve fo tho a. South Africa nen Test an khelh khan a hmasa pahnihah Kohli chuan Ajinkya Rahane chu a khelhtir lo a, England nen Test an khelh hmasak tum pawhin Pujara chu a khelhtir lo bawk a. Lord’s field hnim hring dupah spinner pahnih a thlang a, hetiang thilte hi captain tha tak thil tih a ni lo hle.
Kum li chuang zet chu Kohli hian India Test team chu a kaihruai ve tawh a, ODI team pawh kum hnih chuang chu a kaihruai tawh bawk a. Hemi hun chhung hian thutlukna tha tak tak a siam rualin sawisel hlawh tak tak pawh sawi tur a awm nual bawk a. ODI bikah phei chuan Kohli hian Dhoni chu a rawn fo a, an inrawn hnua thutlukna siam pawh a nei nual tawh a ni.
World Cup 2019 khelh mekah Virat Kohli hian thutlukna siam fuh deuh deuh a nei thung a, a bikin team a rem fuh thei hle a, a aia tha zawka rem ngaihna awm lo tur khawp a tih theih hial a. Che tha chho tak Mohammad Shami aiah Bhuvaneshwar Kumar chu a thlang tlat a, IPL vela a chet angin che thei meuh lo mahse Kohli chuan Kumar hi a thlang ta tho a ni.
Australia nen an inkhelh tumin Oval-ah vuak hmasak a thlang a. Pitch chu hman tawh hnu a ni a, a awm dan a en chian hnuah inning hnihnaah chuan a muang tawh dawn tih a ring nghal a. A rin ang tak hian thil a awm a, hei hi India chuan an chet fuhpui ta hle nghe nghe a, Kohli chu captain tha a nihna a lang chhuak a ni.
Pakistan nen an inkhelh tum khan ruah chu sur thut thei dinhmunah a ding reng a, heti chung hian Kohli chuan third pacer thlang loin Kuldeep Yadav chu a thlang a. Kuldeep hi a hma zawngin hlauhawm anga ngaih a ni lo a, Pakistan nen an inkhelh tum erawh kha chuan India tan a tangkai em em mai a ni.
Virat Kohli hian a team te hlutna a hre chiang a, chhan pawh a chhan hle a. Field chhung leh pawna an hlawhtlinna hmel hmuh chu a nuam tih berte zinga mi a ni.
India captain Virat Kohli hi captain leh hruaitu nih phu tak tak a ni tawh a, midangte tana entawn tlakin field chhungah leh pawnah a awm thin a, India chu World Cup khelh mekah pawh champion beiseiawm ber pawl a nihpui mek a ni.