India basketball team-ah Lalrina Renthlei

31st May 2018, 11:05PM

Mizoram Super League Season 4 MVP Lalrina Renthlei chu India Senior Men's Basketball Team-ah tel tura koh a ni a, Basketball Federation of India (BFI) chuan Mizoram Basketball Association (MBBA) pawh an hriattir tawh.

India chuan FIBA Basketball World Cup 2019 qualifier a khel dawn a, July 5, 2018 atangin national coaching camp an nei tan dawn a, heta tel tur hian Lalrina hi an ko a. National camp hi Sree Kanteerva Indoor Stadium, Bengaluru-ah an nei ang.

India senior team-ah hian a hmain H. Laldinsanga (Mapuia) chu a lo tel tawh a, Lalrina Renthlei hi Mizo zingah chuan India senior team-a khel thei pahnihna a ni a. Mapuia hi tunah chuan India coach te hial a ni tawh a ni.

Lalrina Renthlei hi tun hnaia Mizo basketball player hlawhtling leh lawm hlawh ber pawl a ni a, JL Junior team tan te pawh a lo khel tawh a, Central YMA Basketball Tournament-ah Most Promising Player te a lo ni tawh a ni.

Season hnih vel chu TBL Basketball Club-ah a khel a, chumi hnuah Morning Crew Basketball Club an din leh a, Mizoram Super League awm hnuah Mission Veng Vikings-ah hlawhtling takin MSL 3 thleng a khel leh a.

MSL 3-ah hian Mission Veng Vikings chu a champion pui a, MSL 4-ah Zarkawt BCA-ah a insawn a, Mizo basketball chhungkuaah chuan sawi a hlawh hle a. Zarkawt BCA hi MSL 4-ah a champion pui leh nghal a, Most Valuable Player lawmman a dawng bawk a ni.

Kum 27-a upa Lalrina Renthlei chuan, “Pathian min kaihhruainaah lawmthu ka sawi a, basketball ka khelh theih nana min puitu ka chhungte chungah lawmthu ka sawi tak zet a ni,” a ti.

“MBBA-in Mizoram basketball hmasawn nan theih tawp a chhuah a, MSL an din hnuah basketball a nung thar leh a; mumang lamah pawh kan man phak loh national players leh foreign players tha tak takte nen kan khelho a, hma kan sawn bakah BFI lam ten min hriat phah a. Chu vang chuan MBBA, Zonet, ka khelh tawhna club leh keimaha rinna nghattu BFI chungah lawmthu kan sawi a ni,” a ti bawk.

A sawi zelnaah, “Snooker lamah India tan ka lo khel tawh a, Basketball-ah India tana koh ka ni leh hi ka lawm tak zet bawk a ni. Min duhsaktute ka tan an pawimawh hle a, min tawngtaipui a min thlawp zel turin kan ngen tak zet a; India tan theih tawp chhuah ka tum a ni," a ti bawk.

MBBA President Pu Malsawmtluanga chuan, "India Senior Men's Basketball Team tana Lalrina Renthlei koh a ni hi MBBA chuan kan lawmpui hle a, a tumruhna leh thawhrimnate Pathianin mal a sawm a ni,” a ti a.

“Mizoram Basketball in mel lung thar kan kai a, Zonet nena tangkawpin Mizoram Super League hlawhtling tak kan din hnuah Mizo ten basketball kan hlut thar leh a; club leh players te inpekna zarah baksetball chuan hma kan sawn zel a ni,” a ti bawk.

Copyright © inkhel.com 2024. All rights reserved.