Asia Cup 2018 chu a tirah India rama nghah ni zet mahse an sawn leh a, United Arab Emirates chu a thlengtu an ni ang.

September 13 leh 28 inkara khelh tur Asia Cup 2018 hi Dubai leh Abu Dhabi khawpuiah te an khel dawn ta a. Hetianga Asia Cup khelhna tur an sawn leh daih chhan hi Asian Cricket Council (ACC) chuan politics boruak vir vel vang niin an sawi.

Asian Cricket Council leh PCB chairman Najam Sethi chuan, “India leh Pakistan inkar boruak inmung vel avangin Asia Cup tihna hmun tur hi kan sawn leh a. Hetianga thutlukna kan siam hi kan zavaia tan a tha berin kan hria a ni,” a ti.

A sawi zelnaah, “Thutlukna kan siam hian kan inlungrual khawp mai a, sawn duh ve lo hi tumah an awm lo a. Rorelnaa kal zawng zawngte chuan international cricket khawvela Pakistan kir leh an thlawp vek bawk a, hei vang hian ACC Annual General Meeting pawh Lahore khawpuia nghah a ni dawn a. BCCI chuan ACC member dang zawngte ang bawkin an tel ve tur thu an sawi tawh a. Emerging Asia Cup match thenkhat pawh Pakistan ah an khel ang,” a ti bawk.

Asia Cup ah hian full member - India, Pakistan, Sri Lanka, Bangladesh, Afghanistan te bakah team dang pakhat an tel dawn a, 50-overs match an khel ang a. Team dang pakhat tel tur hi play-off hmangin UAE, Hong Kong, Nepal, Singapore, Malaysia leh Oman te chuan an zawng dawn a. Abu Dhabi leh Dubai te chu an inkhelhna hmun tur niin, India chu official host angin an awm tho ang a. Emirates Cricket Board chuan an stadium te an lo hman hawhtir dawn a ni.

Tun tum hi Asia Cup vawi 14-na a ni tawh dawn a, a hmasa 12 te chu ODI anga kalpui a ni hlawm a, Asia Cup 2016 kha T20I anga kalpui tan niin, World T20 inpuahchahna ang deuha ngaih a ni a. Kum hnih kalta khan India chuan Bangladesh an hneh a, champion lai mek an ni.

2018 Emerging Teams’ Asia Cup khelh a ni dawn bawk a, hei hi Pakistan leh Sri Lanka te chuan an thlen dun dawn a. A tirah April thlaa khelh tura tih a ni a,mahse December thlaa khelh turin an sawn leh a ni.