18 Jan 2020 04:07

inkhel

Inchhirna nei loin ka chawl dawn: Caroline Wozniacki

Caroline Wozniacki chuan Australian Open khelh zawhah tennis khelh a chawlhsan tawh dawn a, a chawlh hian inchhirna a neih dawn loh thu a sawi.

Melbourne khawpuiah Australian Open chu an khel tan dawn hnai tawh a, Caroline Wozniacki chuan American player Kristie Ahn chu a hmachhawn dawn a. He tournament a khelh zawh hunah tennis khelh chu a bansan zui tur thu a sawi lawk tawh a ni.

Kum 29-a upa Caroline Wozniacki hian kum hnih kaltaah khan Simona Halep hnehin Australian Open title hi a lo la tawh a, a vanglaia trophy lian tham a lak awm chhun a ni nghe nghe a. A inkhelhna atang hian £27 million vel zet chu lawmmanah a la hman a, tunah chuan he infiamna hi chawlhsan a hun tawh nia a hriat thu a sawi a ni.

Wozniacki chuan, “Tun tum hi tournament ka khelh hnuhnun ber tur a ni dawn ta a, chuti chung chuan tournament dang ka khelh ang velah tho khan ka ngai a. Nuam ti takin ka inkhel dawn a, engmah min delh rittu tur a awm lo,” a ti.

“Inkhelh chhungin rilru hahdam deuha ka awm reng theih dawn leh dawn loh chu ka sawi thei rih lo a, hetiang dinhmunah hian ka la din ngai loh avangin engtin nge ka awm dawn ka sawi thei lo a ni,” a ti bawk.

A sawi zelnaah, “Tunah rih hi chuan ka la hahdam khawp mai a, ka chhungte chuan min rawn tawiawm thei a, lawmawm ka ti hle a. Kan inkhelh hunah chuan rilruah eng eng emaw chu a awm ngei dawn chiang a, a boruak pawh a danglam ve deuh turah chuan ka ngai,” a ti.

“Hun rei tak ka lo ngaihtuah tawh a, thutlukna ka siam ta chu ania. Ka hun kal tawh kha ka ngaihtuah let a, thutlukna dik ka siam chuan ka hria a. Chhan chi hrang hrang avangin chawlh hun dik tak ni ngeiin ka hria a. A tir atanga tun thlenga thil awm dan ka ngaihtuah hian inchhirna tur ka neih ka hre lo a ni,” tiin a sawi.