ICC Cricket World Cup khelh mekah India chuan Thawhlehni khan Edgbaston-ah Bangladesh an hneh a, champion lai Australia ang bawkin semi final an lut a ni.

Bangladesh chu an chak loh avangin an tan semi final beisei theih a ni tawh lo a. Anni bakah hian team 10 zingah Sri Lanka, South Africa, West Indies leh Afghanistan te pawh an zinkawng a lo tawp tawh bawk a ni.

India leh Bangladesh te result avang khan a thlengtu England bakah New Zealand leh Pakistan te tan semi final luh theihna hun a la inhawng zel a. Heng team pathum zinga pahnih hian semi final an lut chho ve leh thei dawn a ni.

World Cup-ah hian team te chuan an chak apiangin point 2 an hmu thin a, inhnehtawk emaw, ruah sur vanga an inkhel thei ta lo emaw a nih chuan team pahnihte chuan point 1 ve ve an hmu thin a. Group stage tawpah team pahnihte point a inang a nih chuan a chak hnem zawk chu an tlang zui zel thin.

An chak zat a la inang fo a nih chuan run rate tha zawk chu an dah chungnung thin a. Chutiangah pawh team pahnihte chu an la intluk zel a nih tak leh an pahniha an inkhelh tuma an result chu thutlukna siamna atan an hmang dawn a ni.

New Zeland, England leh Pakistan hmabak
Zaninah hian England leh New Zealand te chuan pool match khelh an khel dawn a, he match hi team pahnihte tan a pawimawh viau dawn a ni.

Anni pahnih inkhelah hian 2015 finalist New Zealand hian a thlengtu England hi an hneh a nih chuan semi final-ah an inhlang chho thei dawn a. Pakistan te nen point 11 an hmu a nih pawhin New Zealand run rate chu a that zawk dawn avangin an tlang zawk tho dawn a ni.

England hi an chak ta zawk a nih chuan semi final-ah an lut chho ang a, a chak lo zawk an lo nih palh pawhin engkim a tawp nghal mai dawn bik lo a. Lehlamah Pakistan leh Bangladesh an inkhel dawn a, Pakistan hi an chak zo ta lo a nih chuan England hi tlawm mahse semi final-ah an kai chho thei tho dawn a ni.

Pakistan tan chuan New Zealand-in England an hneh ngei a pawimawh viau dawn a, anmahni pawh hian semi final lut thei tur chuan an khelhpui Bangladesh chu an hneh ngei a ngai dawn bawk a ni.

League stage-a an match hnuhnung ber hian team chungnung ber a ti chiang thei dawn a. Australia chuan an match hnuhnung berah South Africa an hneh a nih chuan point 16 an hmu ang a, an chungnung ber dawn a. India-in Sri Lanka an hneh a, Australia an chak lo a nih chuan India chuan point 15 an hmu ang a, dinhmun sang ber an luah thei thung ang.