International Cricket Council (ICC) chuan vawiin (1.6.2018) khan Nepal, Netherlands, Scotland leh UAE te chu ODI ranking-ah an telh thar.

ODI ranking-ah hian a hmain ram 12 an awm sa a, vawiina ram pali an telh belh takah chuan a vaiin ram 16 an awm tawh dawn a. Heng ram tel tharte inkhel chuan awmzia a nei thui viau tawh dawn niin ICC chuan an sawi.

Netherlands hian nikum khan ICC World Cricket League Championship title an la a, hei vang hian team 13 telna ODI league-ah an tel ve theih phah a. UAE hi ICC Cricket World Cup Qualifier 2018 ah Netherlands te nen a chungnung pathum zingah an lang tel a, hei vang hian ODI status hi an nei thei bawk a ni.

Ranking-ah hian Scotland chuan point 28 neiin 13-naah an awm a, 12-naa awm Ireland aiin point 10 in an hniam a. UAE chu Scotland hnuaiah point 18 hmuin an awm a, Scotland ai hian point 10 in an hniam ve leh chhawng a. Netherlands chuan point 13 an hmu mek bawk.

Nepal leh Netherlands te hian ranking table-a an hming tilang thei tur chuan match 4 ve ve an la khelh a ngai a ni.

Team te hian ODI rating nei team an hmachhawn atangin point an hmu thin a, May 1, 2015 leh April 30, 2017 inkara point leh match te chuan point 50% an pu ang a, May 1, 2017 hnua an match khelh chuan 100% a pu thung dawn a. Heng ram 4 an telh belh avang hian a hmaa ram 12 awm sa te dinhmun chu a khawih buai phah dawn lo a ni.

Ranking thar berah hian kum thara ICC Cricket World Cup thlengtu tur England chu pakhatna an ni a, India chu pahnihna niin pakhatna hi point 3 in an um pha lo a. ICC Champions Trophy champion Pakistan chu paruknaah an awm.