Kenyan marathon runner Eliud Kipchoge leh Colombian long jumper Caterine Ibarguen te chu International Association of Athletics Federations (IAAF) chuan Athlete of the Year atan an thlang.

Eliud Kipchoge chu September thla khan Berlin Marathon-ah pakhatna niin, 2:01:39 chhungin a thleng thei a, a hmaa world record ni lai aiin minute 1 leh second 18 ngawtin a thleng hma zawk a, world record thar a siam mai bakah, 1967 hnua mipa marathon bika hmasawnna nasat ber tum a ni bawk a ni.

Caterine Ibarguen chuan triple jump lamah hming a chher tawh viau a, hemi piah lamah hian long jump-ah pawh a duai lo a ni tih a lantir chiang hle a. Colombian athlete hian IAAF Diamond League finals-ah long jump leh triple title te chu a la a. Triple jump competition vawi 8 a tel tawhnaah tumahin an la khum thei lo a, kuminah a zuan thui ber chu 14.96m a ni.

Female Athlete of the Year Ibarguen chuan chawimawina dawng tura a hming an puan chuan a hamhaih thu sawiin, “Ka khur nasa lutuk a, ka ding thei lo tep a ni,” a ti.

Swedish athlete Armand Duplantis chuan world U-20 record siamin pole vault-ah 6.05m a sang a invawrh thei a, hei vang hian senior European title a la a, IAAF chuan Male Rising Star of the Year atan an thlan phah bawk a. American sprinter Sydney McLaughlin chu Female Rising Star of the Year atan an thlang bawk.

Kum 91-a upa Swiss mi Andreas Brugger chuan President’s Award a dawng a, Woman of the Year atan chuan Puerto Rican Evelyn Claudio Lopez an thlang a. Coaching Achievement Award chu United States distance running coach Joe Vigil chuan a dawng a, Joe hian coaching hi kum 50 zet a lo luhchilh tawh a. Felix Sanchez Arrazola chu Athletics Photograph of the Year award an hlan bawk a ni.

Infiammi thahnem tak, kumin chhunga world record thar siamte chu chawimawina an hlan hlawm bawk a, heng zingah hian Chinese race walker Liang Rui pawh a tel a. 2018 chhungin senior world record 10 leh world U-20 record 10 a awm niin IAAF chuan an sawi.