​I-League khel turin Aizawl FC a inpeih ta

06th January 2016, 12:01AM

Mizo mipuite nghah fak thin leh football ngainatute beisei chu a takin a lo thleng dawn ta. I-League khel turin Aizawl FC official leh player-te chuan ni 6.1.2016 hian Lengpui atangin Kolkata an pan dawn ta a. Ni 9.1.2016 Inrinni hian Aizawl FC chuan an match hmasa berah I-League champion lai Mohun Bagan chu Salt Lake stadium-ah an tum nghal dawn a. Mizo-te football-a kan thlen chin fiahin a awm nghal dawn hian he match hi a tinghahhlelhawm zual a ni.

Aizawl FC te hi I-League 2nd Division 2014-15 ah champion in I-League 2015-16 khel turin an inpet tling a. 2015-16 season tan a nih veleh atangin I-League atana inbuatsaihna an tan nghal a. Head Coach atan EUFA Pro License nei Manuel Ratamero Fraile la-in, Asst. Coach-ah AFC ‘B’ License nei leh AFC ‘A’ license pek nghak mek Naga Coach N.William Koso chu an la lut bawk. Squad lam pawh tichak chhovin, Japanese Midfielder Yuta Kinowaki la lutin, Liberian Striker Alfred K Jaryan an chelh a. MFA buatsaih Independence Day football tournament 2015-ah champion zuiin, Mizoram Premier League 2015-16 ah table-ah a sang ber niin final-ah Chanmari FC hnehin an champion a ni. I-League atana inbuatsaihna ngawrh taka kalpui zui zelin, Japanese Striker Atsushi Yonezawa an la lut a, I-League kaipuitu MPL 3-a best defender Emmanuel Chigozie la letin, I-league kal taa pathumna Royal Wahingdoh atangin Lalchhawnkima an la lut bawk. Anni bakah hian India U19 player leh an rinrawl zing a mi Lalramzauva chu an sign leh bawk a ni.

Club-in hma a lakna piah lamah Mizoram sawrkar leh MFA lamin nasa takin Aizawl FC hian Aizawl-ah ngei I-League an khelh theihna turin hma an la a. Mizoram Chief Minister hmalaknain chak takin RG Stadium, Mualpui pawh tihphuisui chhoh a ni a, AIFF pawhin Mizoram sawrkar inhuamna leh hmalakna te, MFA lam hmalaknate avangin Aizawl FC home ground atan RG Stadium, Mualpui chu an rawn pawm sak a ni.

I-League khel tur meuh chuan thildang inbuatsaihna nasa taka kalpui a nih laiin sum leh pai lamah pawh mamawh a lo sang zel a, Aizawl FC dinthar leh a nih atanga lo tanpui thintu Northeast Consultancy Services (NECS) chuan Aizawl FC ten I-League an khelh theihna turin sum lamah a tanpui (Sponsor) chhunzawm zel dawn a. NECS bakah hian Aizawl FC Kits (Jersey etc) zawng zawng te VAMOS (Kolkata) chuan an sponsor bawk a ni.

Senior lamin I-League atana inbuatsaihna ngawrh taka an kalpui mek laiin, Aizawl FC Academy lam pawh inthuam chak zel a ni a. Head Coach atan Coach Senior leh Academy lama hnuhma ngah, Mohun Bagan Academy ah pawh lo awm reng tawh, AFC ‘A’ License holder Pu Jahar Das chu lak a ni a, Ani hnuaiah hian Nicky Malsawmtluanga leh H.Lalnunzira ten ngawrh takin training an neih pui a ni. Aizawl FC Academy team (Under 18 team) te chuan ADFA 1st Division League-ah table-a a sang ber niin Final hi Chhinga Veng FC nen ni 19.1.2016 hian an khel dawn a, Mizoram Premier League Playoff khel turin an in petling a ni. Tin, I-League Under-18 2015-16 khelh mekah Rest of India Zone champion niin, Zone hrang hrang a team khel zingah an tum puite hneh vek chunga Final Rounds thleng chhun an ni bawk. Ni 27th January 2016 atang hian Final Rounds an khel dawn a, Group B-ah awmin East Bengal FC U18, Pune FC U18, Royal Wahingdoh FC U18 leh Salgaocar FC U18 te nen semi final luh an inchuh dawn a ni.

Aizawl FC Academy (Under 15 team) te chuan I-League Under 15 khel turin ngawrh takin tunah hian training an nei mek bawk a. Rest of India Zone-ah awmin India ram Club tha dang naupangte leh Academy tha tak tak ten en champion nih inchuhin an inel dawn a ni.

Aizawl-a Academy te bakah hian N.Lungleng (Residential Academy), Khawzawl, Mamit, Lengpui, Kawnpui, Zawlnuam leh Zampui Tlang (Tripura) ah Academy hi kalpui a ni a. Hengte bakah hian Kohima(Nagaland), Churachandpur (Manipur), Tahan (Myanmar) leh Meghalaya ah te Aizawl FC Academy din turin chak takin hma lak mek a ni.

Aizawl FC chuan Mizo mipuite tawiawmna leh tanpuina a ngen a, hmun hrang hranga awmte, a bikin, Aizawl FC ten Away match kan khelhna tur hmuna awmte an inkhelh hunah lo tawiawm ngei turin a sawmin a ngen tak meuh a ni e. 

Copyright © inkhel.com 2024. All rights reserved.