Mizoram History-a chuang reng tawh tur vawiin khan Aizawl Football Club-te chuan mel lung thar an phun ta. Aizawl FC hian I-League 2nd Division khelh zawh a nih hmain I-League ah an inpet kai ta a ni.
I-League 2nd Division Round hnuhnung ber dawttu Round 13 chu vawiin khan Golaghat Stadium-ah Aizawl FC leh Chanmari FC ten an khel a, Aizawl FC hi chak ringawt mahse Lonestar Kashmir FC an chak la chak ve zel chuan Round tawp ber thlengin tunge I-League-a inhlangkai tih kan hre thei dawn lo.
Hetih lai hian Aizawl FC chuan 4-2 in Chanmari FC an hneh a, an elpui ber Lonestar Kashmir leh Kenkre Sports te chu 1-1 in an inhnehtawk ta hlauh mai. Point 4-in Aizawl FC hian Lone Star Kashmir lakah hma an hruai fal ta a, Round hnuhnung berah Aizawl FC hi chak lo pawh nise phak ngaihna a awm ta lo, a vawi khat nan Mizoram chuan I-League club a nei ve ta.
Chanmari FC 2-4 Aizawl FC
(Malsawmfela 79', Lalrosanga 90+3') (Brandon 9', Dampuia 13', 60', Kemah Jaryan 51')
Chanmari FC : Mama, Ricky, Richhana, Ruatthara, Achia, Chhinga, Dingngheta, Valpuia, Sawmfela, Biaktea, Joel
Aizawl FC : T.Mawia, Zuala, Emma, Thakima, Chullova, David, Rohminga, Dampuia, Alfed, Brandon, Michael.
Golaghat Stadium-a inkhel hmuhnawm takah Brandon leh Dampuia goal hmangin first half-ah Aizawl FC hian si hnih faiin hma an hruai. Second half-ah Kemah leh Dampuia hmangin Aizawl FC hian 4-0 laiin hma an hruai ta. Malsawmfela leh C Lalrosanga hmangin Chanmari FC chuan goal hnih an khung ve leh a, 4-2 in Aizawl FC chuan hnehna an chang ta a ni.
I-League 2nd Division-ah hian team tin hi an intum tawk thin khawp mai a, hei vang hian Round 13 khelh hma thleng kha chu I-League a kai tur a hriat theih loh, mahse Lone Star-in an khingpui a zawnin an draw pui ta si a, Aizawl FC chuan khelh 13 atangin 31 points an nei ta a, Lone Star chuan 27 points neiin game khat la awm mahse Lone Star tan umphak rual an ni ta lo a ni.
Aizawl FC hian vawi hnih chak loh an nei a, Chanmari FC leh LoneStar Kashmir FC te an lo hneh lo tawh a, draw vawi khat an nei a, vawi 10 lai hnehna an chang. I-League 2nd Division champions hian 2015-16 season-ah I-League an khel ve dawn ta a ni.
Inkhel.com chuan Aizawl FC manager Pu Hmingthana kan be nghal a, Pu Hmingthana chuan,"Pathian hnenah lawmthu ka sawi hmasaber. Kan game a tha a, goal khungna chance pawh kan nei nual. Kan inkhelh hma atangin keimahah chuan ka hahdam khawp. Tawngtaina kan dawng nasa, hei hi kan lawmna ber a ni.
"Kum 4 hnuah kan chak em em I league khel turin Pathianin min hruai hi a ropui. Final round kan thlen hmasak ber khan, 1st leg kan khelh zawh zanah dinner Siliguri-ah kan ei a. Thusawi tura min sawm chuan 'kum 5 chhungin NE team tam zawk hian I League an kai anga, keini pawh chumi zinga chuan tel ngei kan tum ',tiin ka sawi, min lawm khawp mai. Kan duhna Pahianin mi hriatsak hi ka lawm khawp mai," tiin a sawi.
Aizawl FC chu North East India atanga I-League khel thei club pangana a ni ta a, inkhel.com chuan Mizoramin I-League club kan nei ve ta hi kan lawm tak zet a, Pathian chungah kan lawm a. Mizoram Football Association, Sawrkar, Football club, Mizoram Premier League, Mizo Football fans zawng zawngte thawhrah a ni tih kan hria, kan chhuang em em che u. A bik takin Aizawl FC leh club neitu Pu Robert-a te thawhrimna kan chhuang tak zet a ni.
Chanmari FC kan ui pui hle a, hetih lai hian club pakhat chiahin I-League an khelh dawn si avangin Aizawl FC an vannei ta a, Chanmari FC hian I-League khelh ngei tumin season tharah bei leh ngei se kan duh a, an performance kan hria a, season tharah chuan keini mai ni lo, India rama Football chanchin hriate chuan Chanmari FC hian I-League an kai ngei an ring ve hlawm dawn. Season thara in tlin ve ngei theih nan duhsakna kan hlan a che u.