F.Lalchhandama (Papuia) Memorial I-Day Celebration Football Tournament for Veteran semifinal chu August ni 12, Thawhtanni zan khan khelh a ni a, Saron Veteran FC leh Mizoram Police Veteran Team chuan an khingpui ve ve hnehin final an lut. Final hi August ni 15, Ningani chawhnu dar 2:00-ah khelh a ni ang.
Saron Veteran FC
Final luh inchhuh inkhel hmasa zawk Saron Veteran FC leh 80s Teenagers Durtlang te minute 90 chhungin 2-2 in an inhneh tawk a, Penalty Shootout-a chak zawk zawn a nih hnuah Saron Veteran FC chuan 5-4 a hnehna changin final an lut ta a ni.
05:15 PM Saron Veteran FC 2-2 80s Teenagers, Durtlang
(Zothlamuana 7', Lalthanga 85') (Vanlalhriata 62', 77')
(Penalty Shootout-ah Saron Veteran FC 5-4 in an chak)
Inkhel tan atangin 80s Teenagers chuan inkhel thunun zawk mahse, Saron Veteran FC chuan goal an khung hmasa zawk a, inkhel tan atanga minute 7-ah Saron Veteran FC tan C Lalrosanga ball pek tha zet chu box pawn chiah atangin Zothlamuana chuan pet goal-in an hmahruaina khung mahse second half huntawp dawn minute 8 ala awmin 80s Teenagers tan Vanlalhriata chuan freekick atangin an siphurh a rul a, hunpangngaiah 1-1 in an inhneh tawk.
Extra time khelh zui a ni a, 80s Teenagers chuan an hun tha neih hmang tangkai hmasa zawkin minute 77-ah Vanlalhriata bawk chuan an goal hnihna khungin 2-1 a ni ta. Saron Veteran FC chuan an siphurh sutna hun tha nei mahse goal an khung mai thei lo. 80s Teenagers chuan 2-1 in hnehna an chang mai dawn emaw tih hnu huntawp dawn minute 5 ala awmin Saron Veteran FC tan corner atanga ball lo kal chu Lalthanga chuan tauh lutin an siphurh a rul a, 2-2 in an inhneh tawk ta a ni.
Penalty Shootout-in chak zawk zawn a ni a, Saron Veteran FC atanga pet tu ten an pet goal vek laiin 80s Teenagers atanga pet Jimmy Lalthanpuia chuan a pet goal lo a, Saron Veteran FC chuan 5-4 in hnehna an chang ta a ni.
Police Veteran Team
06:30 PM Police Veteran Team 4-1 Dinthar Veteran Club
(Joseph Hmangaihzuala 7', F Lalmawizuala 9', 16', R Vanlalfela 33') (Milan Chhetri 23')
Inkhel hnuhnungah Police Veteran Team chuan 4-1 a Dinthar Veteran Club hnehin final an lut bawk. Police Veteran Team tan F Lalmawizuala chuan goal hnih a khunga, Joseph Hmangaihzuala leh R Vanlalfela chuan goal khat ve ve an khung bawk. Dinthar Veteran Club tan Milan Chhetri chuan goal khat a khung ve bawk.
Goal lut te hi first half-a lut vek an ni a, Police Veteran Team chuan inkhel thunun zawkin minute 9 chhungin goal thum lai an khung hman a, Joseph Hmangaihzuala'n goal hmahruai a khung hnuah F Lalmawizuala chuan goal hnih khung zuiin 3-0 in Police Veteran Team chuan hmaanhruai nghal.
Dinthar Veteran club chuan goal thun ngei tumin an nawr let a, minute 23-ah Milan Chhetri chuan an siphurh sut then mahse huntawp dawn minute 2 ala awmin Police Veteran team tan R Vanlalfela chuan an chak nemnghehna goal khung leh in Police Veteran team chuan 4-1 in hnehna an chang ta a ni.
(adsbygoogle = window.adsbygoogle || []).push({});