I-Day Football : Tuaitea a lo kir leh ta

05th August 2015, 01:08AM

August ni 4, 2015 khan AR Lammual-ah I-Day Football Tournament (Mipa) khelh chhunzawm a ni a, ZO United leh Aizawl FC te chuan an khingpui an hneh ve ve, ZO United tan Tuaitea chuan goal a khung nghe nghe a ni.

Inkhel hmasa zawkah Luangmual FC leh Zo United FC te an inkhel a, ZO United hian 2-1 in Luangmual FC an hneh. Goal thumte hi second half-a lut vek an ni a, B. Malsawmzuala chuan ZO United tan goal hmahruai a khung a, hemi hnu lawk hian Tuaitea kan hmu ta, hnai set sawta cool takin a push goal a,  Zo United tan a goal hmasa ber a khung ta, si hnih faiin an chak mai tawh dawn emaw tih laiin Luangmual FC chuan hun tawp dawn minute 10 vel la awmin Lalliansang hmangin goal khat an khung ve hlauh a, 2-1 in Zo United chuan hnehna an chang ta a ni.

Mizo Footballer duhawm ber leh hmakhaw eng ber tia kan sawi thin Tuaitea chuan a vanglai a tawn chhoh tak tak hmain Football a chawlhsan dawn emaw kan ti hman, MPL 3 khan Chanmari FC tan a inlan tak tak thei ta lo, inhliam vangin a chawl leh ren rawn a, mahse tunah chuan Tuaitea a fit chho leh mek, a fitness-in duhthu la sam lo mahse a class erawh a la ngai reng, Tualchhung Football tihmuhnawm tu a ni dawn chiang e.

Luangmual FC hian an khelh hmasa berah Chanmari West FC goal awm lovin a draw pui a, Zo United FC hian Aizawl FC 3-0 in an hneh lo thung.  Luangmual FC hian point 1  neiin, Zo United FC erawhin point 3 an hlawhchhuak ve ta. August ni 6, 2015 (Ningani) dar 01:00 PM-ah Zo United FC hian Chanmari West FC an hmachhawn ang a, tlai dar 3:00 PM-ah Luangmual FC hian Aizawl FC an hmachhawn thung ang.

Inkhel hnuhnung zawkah Aizawl FC chuan an khingpui Chanmari West FC chu si hnih fai in an hneh a. Goal lut te hi hun tawp dawna lut ve ve niin, minute 86 ah William Lalnunfela chuan Aizawl FC goal hmasa zawk a khung a,  90+2 mins-ah David Lalrinmuana chuan a khung leh a, si hnih faiin hnehna an chang ta a ni.  Aizawl FC hian an khelh hmasak berah Zo United FC si thum faiin an hneh a, Chanmari West FC hian Luangmual FC hi goal awm lo in an hnehtawk. Aizawl FC hian point 6 nei tawhin, Chanmari West FC hian point 1 an nei thung a ni.

August ni 4, 2015 Thawhlehni Results:-

12:30 PM Luangmual FC 1-2 Zo United FC

(Lalliansanga 79') ( B. Malsawmzuala 55', PC Lalawmpuia 60',)

03:00 PM Aizawl FC 2-0 Luangmual FC

(William Lalnunfela 86', David Lalrinmuana 90+3')

August 5, 2015 Ningani Fixtures:-

12:30 PM Chanmari FC vs Bethlehem Vengthlang FC

03:00 PM Mizoram Police FC vs Dinthar FC

Copyright © inkhel.com 2024. All rights reserved.