I Day Football Tournament 2022 chu August ni 2, Thawhlehni khan Ar Lammualah khelh chhunzawm ni. Inkhel vawihnih awmin Chanmari FC leh Mizoram Police FC chuan ankhingpui ve ve an hneh.

August ni 4, Ninganiah khelh chhunzawm tur a ni a, dar 12:00-ah FC Venghnuai leh FC Bethlehem te an inkhel ang a, dar 2:30-ah Chawnpui FC leh Aizawl FC an inkhel ang.

12:00PM Chanmari FC 2-1 Electric Veng FC (Group B)

(Lalhriatpuia 77', Lalnunzira Sailo 85') (Amos Lalnienga 63')

Goal lut te hi second half-a lut vek an ni a, Electric Veng FC chuan goal khung hmasa zawkin minute 63-ah goalkeeper Rinzuala manpial chu box-a awm Amos Lalnienga chuan a tauh lut. Chanmari FC chuan nawr letin minute 77-ah mual veilam sir a tanga Zakaria ball vawrh tha tak chu box chhunga awm Lalhriatpuia chuan goal-ah chantirin an siphurh a rul.

Goal lut awm tawh lo in khelmual an chhuah san mai dawn emaw tih hnu huntawp dawn minute 5 ala awmin Chanmari FC tan Lalnunzira chuan an chakna goal a khung ta a ni.

2:30PM Chhinga Veng FC 0-2 Mizoram Police FC

(Malsawmfela 15', Lalbiakhlua 72')

First half-ah goal khat alut a, goal awm chhun hi inkhelh țan a țanga minute 15-ah Mizoram Police FC tan Biaktea ball pek chu Sawmfela chuan box-ah la lutin chiang takin a khung.

Second half țan a țanga minute 10-ah Chhinga Veng defender Abel Lalruatfela chuanpenalty a chawi.   He penalty hi Mizoram Police FC tan Hmunmawia chuan petin Chhinga Veng goalkeeper Rsa chuan a dang. Minute 68-ah Chhinga Veng FC chuan penalty an hlawh chhuak ve thung.  He penalty hi Rinzuala chuan petin Mizoram Police FC goalkeeper Muanawma chuan adan sak ve bawk.

Mizoram Police FC chuan nawr chhunzawmin Minute 72-ah Lalbiakhlua (Hlutea) chuan an goal hnihna akhung leh ta a ni. Chhinga Veng FC chuan an siphurh sut ngei tumin nawr viau mahse huntawp thlengin goal an khung thei lo a, Mizoram Police FC chuan 2-0 in hnehna an chang ta a ni.