04 Aug 2019 09:17

inkhel

Hungaroring-ah Lewis Hamilton pakhatna a ni

Lewis Hamilton chu Formula One Hungarian Grand Prix-ah a che fuh hle a, a tawp lamah hmahruaitu lehpelin pakhatna a ni.

Mercedes driver Lewis Hamilton chuan an team strategy fuh zar a zo a, intlansiak tawp lamah hmahruaitu Max Verstappen chu a lehpel thei hlauh a. Red Bull team strategy chu a fuh ta lo zawk a, Mercedes car ke a la that deuh zawk avangin pakhatna hi an ni theih phah a ni.

Hungary-ah Hamilton hi pakhatna a ni takah chuan drivers’ championship-ah pawh a fal belhchhah hle a, tunah chuan point 62 ngawtin hma a hruai tawh a. Hungaroring bikah hian vawi 7 a chakna a ni tawh a, he intlansiakna hmuna chak hnem ber record a siam tawh sa chu a belhchhah ta zel a ni.

Pathumna atanga bul tantu Lewis Hamilton chu an intlansiak laihawl velah chuan a hma berah a tlan thei tawh dawn emaw tih mai tur a ni hman a. An tlan tan atanga rei vak loah British driver hi pahnihnaah a awm zui nghal deuh mai a, intlansiak laihawlah tlan hmasa ber a ni teuh hle.

Pole position atanga tlan tan, Red Bull driver Max Verstappen chuan second 6 vel ngawtin hma a hruai hman a. Mahse, an tlan rei tial tial a, world champion Lewis Hamilton chuan a hnaih chak hle thung.

Hamilton hian vawi eng emaw zat chu Verstappen hi lehpelh tumin a bei a, mahse Max chu a chiai duh bik miah lo a. Pit stop la fuh zawk an dingchang ta a ni ber a, tyre thar vuah zawk Hamilton chu a tawpah hian a che fuh ta a ni.

Max Verstappen chu pahnihna a ni a, Ferrari chuan pathumna leh palina an hauh a, Sebastian Vettel chu pathumna niin, a teammate Charles Leclerc chu palina a ni a. Hamilton-a teammate Valtteri Bottas chu pariatnaah a thleng a ni.

F1 Hungarian GP Result

1. L. Hamilton - Mercedes

2. M. Verstappen - Red Bull

3. S. Vettel - Ferrari

4. C. Leclerc - Ferrari

5. C. Sainz Jr. - McLaren

6. P. Gasly - Red Bull

7. K. Räikkönen - Alfa Romeo

8. V. Bottas - Mercedes

9. L. Norris - McLaren

10. A Albon - Toro Rosso

11. S. Pérez - Racing Point

12. N. Hülkenberg - Renault

13. K. Magnussen - Haas

14. D. Ricciardo - Renault

15. D. Kvyat - Toro Rosso

16. G. Russell - Williams

17. L. Stroll - Racing Point

18. A. Giovinazzi - Alfa Romeo

19. R. Kubica - Williams

20. R. Grosjean - Haas DNF