Tun Sunday lo awm tur hian Hungarian Grand Prix neih a ni dawn a, race hnuhnung pathuma vawi hnih chak thei Red Bull driver Max Verstappen chu Hungarian GP-ah hian chak tura rinkai ber zinga a mi a ni.

Tun season kal mekah Mercedes chungnun zia kan hre theuha, vawi hnih tih loh chu Mercedes driver pahnih Lewis Hamilton leh Valtteri Bottas-te an la chak zat zat.

Tun season-ah Grand Prix vawi 11 a awm tawh a, Mercedes hi vawi 9 ngawt chak tawin Mercedes tih lovah chuan Verstappen chiah hi chak thei a la awm a, Dutch driver hian Austrian GP leh German GP-te a la.

Hungarian GP neih turah Verstappen chuan rinkai ber an nih loh a sawi a, “Rinkai ber kan niin ka hre lova, mahse theihtawp chu kan chhuah dawn. Mercedes-in season bul an tan tha em em a, um phak an harsa tawh hlea, um phak kan tum ngei dawn mahse title erawh ka thlir thleng lo,” a ti.

Race sawm tun season-ah a la awm a, tunah hian Verstappen hian hmahruaitu Hamilton chu point 62 laiin a pha lo mek. Race hnuhnung ber German GP-ah Verstappen hi a chaka, hemi tum hian Mercedes che chhe hle in Hamilton chu pakuanaah a awma, Mercedes driver dang Bottas chu 15-naah a awm bawk.

Verstappen chuan, “Mercedes hian point 60 chuangin hma an hruaia, kan inkar a zau hle. Race hnuhnung berah an che chhe viaua mahse kan chungah pawh a thleng ve thei reng a ni. Tun season kan thlir chuan Mercedes an chungnun zia kan hmu a, race hnuhnung berah an che chhe bawk nen theihtawp chhuahin an rawn kir dawn a ni,” a ti.