Roger Federer chuan Wimbledon final-a a chak loh hnuah pawi a tih thu sawiin, hun tha a neih a bawhpelh thu a sawi.

Pathiannia Wimbledon mipa singles final hmuhnawm em em maiah Roger Federer leh Novak Djokovic te an inkhel a, a tawp dawn thlengin champion tur zawk hriat theih loh khawpin boruak a awm chho a, Djokovic chu a dingchang ta zawk a ni.

Set hmasa ber chu Djokovic chuan a la nghal a, set hnihnaah Federer chu a chungnung ve leh thung a. Set thumna leh set lina pawh an inlak chhawk leh a, set nganaah pawh a tawp retah a chak zawk a hriat ta chauh a ni.

An inkhelh zawhah Roger Federer chu a hmel atangin a lung a awi vak lo tih a hriat hle a. Thinrim ni chiah si lo, lawm ni chuang si lo tih hriat tak hmel a pu a, a awm dan hi a sawi chhuak zui a ni.

Federer chuan, “Ka awm dan kha ka hrethiam chiah lo. Ka ngaihtuah chian hian chiang taka chak loh nge rilru dam zawk tun tuma ka chak loh dan tih te rilruah a awm a. A hnuah chuan a khawi zawk mah hi a danglam chuang lo tih te ka ngaihtuah tel bawk,” tiin a sawi.

“A hrilhhaithlak a, thin a rim tel bawk a, rilru kha a hnual deuh rawih thei a, ka ni deuh nuaih mai a ni ber. Ka chak lo zawk kha a tirah phei chuan awih harsa ka ti a; amaherawhchu, a nih dan kha a ni miau bawk sia,” a ti bawk.

A hnu deuhah Federer chuan thla thara Montreal khawpuia Rogers Cup khelh turah tel a tum loh thu a sawi a, Cincinnati Masters an khelh hunah erawh tel a tum thu a sawi thung.

“Thil chu a nih dan tur angin a ni vek tawh a, hma lam pan zel a tul a. Team angin kan sawiho hnuah Montreal-ah chuan tel loh ni se tiin kar hmasa khan thutlukna kan lo siam tawh a. Hun awl neih ve deuh tha kan tih vangin tel ve loh hi kan titlu ta a ni,” tiin Federer chuan a sawi.

“Ka hun awl neih hi tangkai taka hman ka tum a, Cincinnati atana inpuahchahna hunah ka hmang ang a, hma lam pan zui zel ka tum a ni,” a ti.