Tottenham chuan Transfer Deadline Day-ah an player mamawh pahnih an la fel hmana, Real Betis atangin Giovani Lo Celso an lakluh bakah Fulham atangin Ryan Sessegnon-te chu Deadline Day-ah hian an lalut bawk.

Lo Celso hian jersey no. 18 a ha dawn a, Sessegnon hian no.19 a ha thung anga, player pahnihte hi Premier League-a Spurs game hmasa berah an khel thei nghal dawn a ni.

Tottenham hian Argentine midfielder Lo Celso hi season khat chhung loan-in an lalut phawt dawn a, nakkum lamah an duh chuan an lei nghet thei dawn. Kum 23 mi hian 2018-19 season kha loan-in Real Betis-ah hian a khela, Betis hian April thla mai khan Lo Celso hi Paris Saint-Germain atangin a nghetin an lalut. Season liamta khan Betis tan PSG midfielder hlui hian game 46 khelin, goal 16 a khung bakah assist 6 a nei.

Kum 19 mi Sessegnon hian Tottenham-ah kum nga daih contract a ziaka, Tottenham chuan an duh chuan kum khat dangin Sessegnnon-a contract hi an pawhsei belh thei dawn a, a manah pound maktaduai pound maktduai 25 sengin, a man hi pound maktaduai ngain a la pun belh thei dawn a, Spurs midfielder Josh Onomah chuan Fulham a zawm thung bawk.

Sessegnon hi 2017-18 season khan Fulham tan Championship lamah a khel tha hle a, left-back ni mahse wing lamah pawh a khel thei. Season liamta khan Fulham tan Premier League-ah khel mahse Fulham hi Championship lamah an tla lehnghal. Season liamta khan Premier League-ah Sessegnon hi teenager zinga assist ngah ber (6) a nih bakah dribbles leh key passes ngah ber a ni bawk a ni.