A vanglaia entertainment wrestler zinga ropui berte zinga mi, tun hnuah pawh a hming an la sawi rik fo Hulk Hogan chu kum khatin a upat belh leh ta chiah a, vawiinah hian kum 68 a tling ve ta.
Hulk Hogan tia hriat lar Terry Eugene Bollea hi August 11, 1953 ah khan Augusta, Georgia, USA ah a piang a. A pa Pietro ‘Peter’ Bollea chu Italian thlah niin in saknaah foreman angin a thawk thin a, a nu chu lam zirtirtu Ruth V a ni.
A naupan lai chuan Hulk Hogan hian baseball khelh nuam a ti thei em em a, Little League Baseball-ah te a tel thin a, pitcher a ni thin a. 1977 atang khan professional wrestling lampang a luhchilh tan a, 1983 a World Wrestling Federation (WWF, tuna WWE) a zawm atang chiah khan mi hriat a hlawh tan a ni.
America ram chawisangtu anga a inlan thin avangin ngainat a hlawh phah em em mai a, 1980 bawr velah kha chuan entertainment wrestling khawvel chu a awp hneh chho hle a. WrestleMania an ti chho tan a, a tir WrestleMania 9 ah vawi 8 zet chu Hulk Hogan hi a inlan a, chu chuan a lar zia a hril chiang viau awm e.
WWF Championship title vawi 5 ngawt a la hman a, a champion hmasak ber phei chuan title a humhim rei bawk a, title humhim rei ber dawttu record a siam thei hial a. Wrestler zingah chuan a zawna Royal Rumble-a chak thei hmasa ber niin, 1990 leh 1991 ah te khan a chak zawn a ni.
1993 kumah khan Hulk Hogan chuan WWF a chhuahsan a, World Championship Wrestling (WCW) lamah a lut a. WCW World Heavyweight Championship title chu vawi 6 lai a la hman a, title kawl rei ber record pawh a siam nghe nghe a. 1996 ah khan a hming chu ‘Hollywood’ Hulk Hogan tiin a thlak a, hei hian boruak a siam lian zui hle.
‘Hollywood’ Hulk Hogan a nih hnuah hian New World Order (NWO) chu a kaihruai chho a, boruak an nei lian thei em em mai a. ‘Monday Night War’ velah pawh Hulk Hogan chu a langsar ber pawl a ni chho thei a, WCW in Starrcade an buatsaihah pawh vawi 3 chu a langsar berah an hmang a. Starrcade ‘97 kha WCW pay-per-view hlawk ber tum niin, kha tah khan Hulk Hogan pawh a tel a ni.
2002 kumah khan Hulk Hogan chu WWE lamah a kir leh a, a vawi rukna atan WWE Championship title a la zui a. 2003 ah khan WWE chu a chhuahsan zui leh ta tho a, 2005 kumah khan WWE Hall of Fame-ah Hulk Hogan chu an la lut a, New World Order (NWO) member a nihna angin 2020 kumah khan a vawi hnihna atan WWE Hall of Fame-ah hian an la lut leh bawk a ni.
Hogan kha American Wrestling Association (AWA), New Japan Pro-Wrestling (NJPW) leh Total Nonstop Action Wrestling (TNA) ah te pawh a tel hman a. NJPW lama a inhman lai hian IWGP Heavyweight Championship title a la nghe nghe a ni.
A naupan lai atanga danglam a ni tawh a, kum 12 a nih khan Hulk Hogan chu feet 6 zeta sang a ni tawh a. Wrestler Hiro Matsuda kaihhruaina hnuaiah training hahthlak tak a nei thin a, a ke ruh te a tliah phah hial a ni.
Wrestling lama a inhman hma hian rimawi lamah a inhmang nasa hman viau a, band lar ve hman angreng tak Ruckus ah pawh a tel thin a. Rocky III film-ah khan a inlan ve a, Thunderlips angin a chang a, ring atangin Sylvester Stallone chuan a paih chhuak nghe nghe a. A takah chuan Hogan leh Stallone te hi thian tha tak an ni.
Wrestler zingah chuan Hogan chiah hi Sports Illustrated kawma lang thei niin, April 29, 1985 ah khan he magazine lar tak kawmah hian a thlalak an chuantir a ni.