Wrestling sawi tawha rilrua lang tel nghal fo thin Hulk Hogan chuan ngaisangtu a ngah thei hle a, khawvel hmun hrang hrangah hriat a hlawh viau bawk a. Hmun kilkhawr em emah pawh an hre deuh zel mai a ni.
Ring chhungah boruak a nei lian thei hle a, vawi ruk ngawt world champion a nih hman bakah Hall of Fame-ah pawh an lak luh tawh a ni a. Wrestler zingah chuan ngaisangtu ngah berte zinga mi a ni.
Ngaihsan a hlawh viau rual hian chanchin duhawm vak lo te pawh a nei ve nual a, ring chhung leh pawnah pawh chanchin lawmawm lo lampang hi a lo nei ve tawh thin a ni.
Hulk Hogan chu khawvela wrestler ropui berte zinga mi niin, ring chhunga a chet hma hian bank-ah a thawk ve hman a. Bank teller hna a chelh ve zuai a, a daih rei lo viau thung a, he hna hi ni hnih chhung chauh a thawk hman a. A chanchin an ziahnaah pawh a hna thawh tawh zinga ziah tel a nih loh phah a ni.
Bank teller hna hi kalsanin wrestling lampang luhchilh hi a thlang a, a tifuh ta hle.
Hogan hian ring chhungah record eng eng emaw a siam hman nual a, Royal Rumble-a vawi hnih chak thei hmasa ber niin, 1990 khan a chak a, 1991 khan a chak zui leh bawk a. Engtikah mah reh thei tawh lo tur chanchin duhawm chu wrestling khawvelah a hnutchhiat nghet viau a ni.
Record a siam hnuah hian Stone Cold Steve Austin leh Shawn Michaels te chuan an nihrual ve leh a, anni pahnih hi Royal Rumble-ah vawi hnih an chak ve ve bawk a, heti chung hian Hulk Hogan hi he record nei thei zingah chuan a langsar ber a ni reng dawn a ni.
Tum khat chu Hulk Hogan hi WrestleMania neih tur chungchang vawrh lar turin TV-ah a inlan a. Show hi Richard Belzer chuan a kaihruai a, an inkawm laklawh lai hian Richard Belzer chuan Hogan chu a move hlauhawm zual chungchang a zawt a, a fuh lo hle.
Zawhna an inzawh hnu hian Hulk Hogan chu a tho chhuak a, Richard Belzer chu chin lock hmangin a va rek a. Hetianga a reh takah chuan Richard hi nikhaw hre loin a awm zui a. Rei vak lo hnuah Belzer chu a harh leh nghal a, a hnuah Hulk Hogan chu vawi hnih ngawt a khing a, $5 million chawi turve vein a khing a ni.
Hogan hian 2007 kumah khan a rin loh deuh thil a tawng a, a nun nghawr nghing dawt thei thil chuan a tlakbuak a. A nupui Linda chuan a hriat loh hlanin inthen dilna a lo buaipui a, hei hian nasa takin Hogan hi a nghawng a ni.
Linda chet dan hi Hogan chuan a hre nghal mai lo a, chanchinbumi pakhat hnen atangin a hre ve chiah a. Hetianga inthenna an tihfel hnu hian Lindia chuan mipa kum 19-a upa a kawp zui a, a mipa kawp hi a fate sikul kalpui thin a ni.
2015 kha Hulk Hogan tan chuan kum duhawm lo berte zinga mi a tih theih a. Hemi kumah hian hnam leh chi inthliarna kaihhnawih thila thiam loh changah Hogan hi an puh a, a sex tape pakhat chu a put ru zui bawk a ni.
Hetianga chanchin duhawm vak lo a neih chhoh takah chuan WWE chuan Hogan nena contract an neih chu an titawp nghal a, WWE Hall of Fame atanga thai bo a ni zui bawk a. Ama kaihhnawih thil hralh chhuah pawh WWE hian an khap zui nghal bawk a, Hulk Hogan hian pawisa pawh a chan phah teuh a ni.