Chelsea rawlthar duhawm tak Callum Hudson-Odoi chuan September thla khan contract thar a ziaka, Chelsea-a cham zel turin kum nga daih contract a ziak.

Hudson-Odoi hi Bayern Munich chuan lakluh tumin an dawr nasa em em thina, sum tam tak hlawh tura an thlem bakah a manah pawh sum an thehchhuak huai viaua, Hudson-Odoi ngei pawh hian Germany lama kal duh hman mahse Chelsea hian an chelh lui.

Bayern Munich-in an dawr lai leh an dawr hnuah te Chelsea chuan Hudson-Odoi hi contract thar ziahpui an tuma, kum khat bak contract nei tawh lo mahse vawi eng emaw zat chu Hudson-Odoi hian Chelsea-in contract thar an zawrh chu a hnar.

Sawi tawh angin Chelsea hian kum khat daih chiah contract nei tawh Hudson-Odoi hi an chelh luia, Chelsea hian nipui chhung khan an legend Frank Lampard chu manager thar atan an lalut bawka, Lampard a luh hnu lawkah kum 19 mi Hudson-Odoi hian Stamford Bridge-ah kum nga daih contract a ziak ta bawk a ni.

Hudson-Odoi chuan Lampard nen vawi khat chauh an titi hnuah Chelsea-a contract thar ziak tura a hmin nghal thu sawiin, “Contract thar ziak tur khan Lampard nen vawi khat kan titi a tawka, a sawi kha sawi chhawng chiah thei tawh lo mah ila ka chungah rinna a neih thu te leh rim taka thawk zel tura min duh thu te min hrilha, a man min rin ang bawka keimahah rinna ka neih chuan Chelsea-ah hmalam hun eng tak ka tan a inherchhuah tur thu min hrilh bawk.

“Lampard hian a tana khel turin min duh a, manager atanga ka hriat duh tak tak te min hrilh bawka, player tha tak ka ni thei tih a ringa, Chelsea tan ropui taka ka la khelh theih ngei a ring tlat bawk. Min ti phur em em a, manager thar a lo lut bawk nen kan phur tlanga, player naupang zawk te a khelh tir nual dawn tih ka hre chho bawk nen khan ka phur zual hle.

“A hmaa ka lo khelhpui tawh te nen kan khel ho leh dawn tih te ka hria a, ka tan pawh a nuama, a tir pawh khan Chelsea-a ka awm tlang hi thutlukna dik a nih thu ka lo sawi tawha, ka hun pum ka hman tawhna a ni a, a tir atanga ka club hmangaih a ni,” a ti.