Chelsea rawlthar Callum Hudson-Odoi chu Chelsea manager Maurizio Sarri-a’n a hmang rim dawn chiah tihah hliamin a tlakbuaka, tun season chhung a tan a inkhelh tawh hmel loh.

Chelsea hian Burnley an mikhual tumin Hudson-Odoi hi first half-ah a inhiliama, khel chhunzawm thei lovin Pedro chuan a thlak.

Hudson-Odoi hian a kheimit bawr vel ti na in a khel chhunzawm zeta, a hnu lawkah na lehin Chelsea daktawr ten an buaipui hnuah lak chhuah a ni.

Hudson-Odoi hian inkhelh zawhah tun season chhunga a inlan theih tawh loh tur thu hi twitter lamah a dah chhuaka, pawi a tih thu a sawi tel.

Tun season chhunga a inlan theih loh tur thu hriat a nih hma hian Chelsea assistant manager Gianfranco Zola chuan Hudson-Odoi a hliam tawrh chu a nat angreng thu leh a hlauhthawnawm thu a lo sawi tawh a, game khelh tur a tam tawh lo nen Hudson-Odoi hi season tharah bak kan hmu tawh rih dawn lo.

Sarri chuan Hudson-Odoi hi a khelh chhunah khel tha thin mahse a chhawr tha duh lo em em a, sawisel pawh a hlawh. Tun hnaiah erawh Pedro leh Willian-te aiin game pawimawh Hudson-Odoi hi a khel chho zeuh zeuh tawh a, a inhliam leh ta si hi a pawi hle a, ngai a awh leh ngei erawh a beiseiawm.

Chelsea academy chhuak Hudson-Odoi hian a khelh tlem em avangin Bayern Munich zawm a lo tum tawh a, Bayern hian ngawrh takin English winger hi dawrin, player pawh hian Chelsea hnenah chhuah a dil hman hial. Chelsea chuan an chelh lui a, a khel tam chho nen Chelsea-ah Hudson-Odoi hi a dam hnuah pawh a la awm chhunzawm zel rih dawn niin a lang.