FA Cup final-ah Manchester City chuan 2-1 in Manchester United an hneh, tan atanga second 12-na lekah Gundogan chuan City tan goal mawi lutuk a khung, penalty hmangin Bruno Fernandes chuan United si phurh a rul a, Gundogan bawk chuan City chakna goal a khung leh.
Inkhelh zawhah United boss Erik ten Hag chuan, " Hrehawm kan ti, kan hnual khawp mai. Game hautak em em a ni. Hetih lai hian ka naute ka chhuang khawp mai.
"Kan khel tha, goal ho takin vawi hnih kan chhuah a ni mai chauh. City kha kan khing tawk khawp mai. Chak duhna thinlung ka nau ten an nei a, tuna kan team hi awlsam taka hneh mai mai theih kan ni bik tawh lo, a tawp lamah te phei kha chuan kan draw teuh kher mai.
"He team hian dinhmun harsa takah pawh rilru paukhauh tak an nei. Team khawng tak din turin hmabak kan la nei teuh mai. He match hi kan tan chuan inenchhinna a ni a, Season thar atana rilru sen dan tur pawh heta tang hian kan nei thiam ta hle a ni," tiin a sawi.
Final-a United captain Bruno Fernandes chuan, "Trophy tam zawk chawi turin hmabak thui tak kan la nei e. Final game kha bul kan tan tha lo, chutih laiin kan nawr let leh thei.
"Goal khung theihna hun tha pawh kan nei bawk. Gundogan khan goal mawi leh danglam bik a khung, City khan chak an phu. Player thiam bik hi chu kan fak mai tur a ni. Tin, ani hi a hma pawhin Premier League player zinga tha ber pakhat a nih thu ka lo sawi tawh thin a nih kha.
"Season tluanin kan fan ten min support tha thin em em, vawiin hian hlim taka awm an phu asin mawle. Dressing room lamah pawh hrehawm kan ti khawp mai. Kan fan ten min support-na zawng zawngah kan lawm a, season tharah ropui zawka lo kir leh kan tum dawn a ni," tiin a sawi bawk.
Manchester United hian season tharah Champions League an khel dawn, Erik ten Hag chuan United team buai tak chu nasa takin a rawn chawi kang leh kan ti thei awm e.
Carabao Cup a chawipui a, FA Cup final a luhpui bakah, Premier League-ah pathumna a nihpui. United player thenkhat hi chu nipui bazar inhawn hunah an chhuak nual ngei dawn. Tin, Ten Hag chuan trophy tam zawk chawi tumin team a thuam thar leh ngei dawn bawk a ni.