20 Feb 2020 04:59

inkhel

Honda tan Marc Marquez a rinawm zel

Marc Marquez chuan Honda tan rinawm zel a tum a, kum 4 chhung atan contract a ziak thar.

World champion Marc Marquez hi Moto2 champion niin, 2013 ah khan MotoGP huangah a zuang lut tan a. Kum 7 chhungin MotoGP title vawi 6 ngawt mai a la thei a, a title lak hnuhnun ber chu nikumah khan niin, Honda rider awm tawh zawng zawngah chuan a la hlawhtling ber a ni.

Kum 27-a upa Marquez hi Honda pawhin chhuahtir mai an hlau ve hle a, tun hnaiah contract thar an zawrh a, hei hi Spanish rider hian a lo pawm a, kum 4 chhung chu an la inhrawn zui leh dawn ta a ni.

Marquez chuan, “Honda Racing Corporation nen kum 4 chhung atan contract kan ziak dun leh thei hi ka lawm khawp mai a. Hondoa hian MotoGP a tel thei turin 2013 kumah khan kawng min hawnsak a, hlawhtlinna hmel duhawm tak kan lo hmu chho nual tawh a ni,” a ti.

“Kan inhrawn tirh kum atangin hlawhtlinna kan nei nghal a, tun thlenga kan la hlawhtling chho zel hian Honda chhungkuaa ka awm hi a lawmawm zia a belhchhah zel a ni,” a ti bawk.

A sawi zelnaah, “HRC hian inzawm zui zel tura remchang an siam hi a lawmawm hle a, anmahni zarah mahni inrintawkna pawh ka neih that phah hle bawk a. Kan thil duh leh kan tum pawh a inang em em a, hlawhtlinna kawng kan zawh mek hi kan chhunzawm zel ka beisei,” a ti.

Malaysian Grand Prix qualifying-a a chetsual avangin Marquez hi a dar dinglam an zai a, hei vang hian hun eng emaw chen chu a awm hahdam a. Tun hnaia Sepang pre-season test-ah khan a inlan ve leh tan a, duhthu erawh a la sam chiah lo niin an sawi.

Honda leh Marquez te hi February 22-24 chhung hian Qatar-ah pre-season test hnuhnung berah an inlan leh ang a, thla thar atang khian season thar atan an intlansiak tan leh tawh dawn a, bul tanna atan Losail International Circuit lamah an tlan dawn a ni.