MotoGP world champion Marc Marquez chuan season tharah team mate thar a neih hmel hle a, Honda rider Dani Pedrosa chuan season tawpah an team a chhuahsan dawn a ni.

Kum 32-a upa Spaniard hi a inhliam ngun ta hle a, hei vang hian beisei angin a che hleithei lo a. 2001 atang khan MotoGP khawvel a luhchilh tan a, Japanese manufacturer nen hian an la inhrawn ngar ngar a. Season tawp hunah chuan Pedrosa leh Honda te hi an inthen dawn ta a ni.

2003 khan Dani Pedrosa hi 125cc champion a ni a, 2004 leh 2005 ah te 250cc champion a ni leh bawk a. “HRC (Honda Racing Corporation) chungah lawmthu sawi ka duh a, anmahni zarah kum hei leh chen hi hlawhtling takin ka tlan ve thei a. Kan awmho rei bawk a, ngainat tak takin ka ngaina hman hlawm a ni,” tiin Pedrosa chuan a sawi.

“Kan nun kawngah chona thar hmachhawn zel hi kan mamawh a, chutiang chiah chuan kei pawhin thil thar hmachhawn ka tum a ni,” a ti bawk.

Pedrosa hi Honda a awm chilh chhungin grand prix 31 ah chak ber a ni hman a, MotoGP ah vawi thum chu runner-up a ni bawk a. Kuminah hian podium a la lawn lo a, tun dinhmunah 12-na a ni mek.